Corpus Van Reenen-Mulder (CRM14): Oorkonde L724r34001

. . Wi jhan van der heiden en_ herman die smit Scepene in Oerle tughen / dat voer ons is comen / Enghelberne_ Ghiselbrechts (onleesbaar) dochter was / met haren mombore dien hare die Richt_ gaf ou_mids vo_nisse der Scepene heeft ghegheuen jhanne Ghiselbrechts zoene van hokastelre haren swagher jn huwelike goede een mudde roghs erflike en_ emmermeer alle jaer op onser vrouwen dach als men kersen dreeght dat men heit sente Marien licht~misse met der maten van Oerle ute enen stuck lands te heffen gheleghen bi der lijnden tot zittert jn der prochien van Oerle tusschen die vier weghe gheheiten dat Lijnde~stucke / en_ dat strect ? Godeuarts broder voerseit Voert sijn comen Enghelberne voerseit met haren voerseiden mombore / Enghelberen en_ lizabet hare kinder met haren mombore dien hon die Richter gaf ouermids vonnisse der Scepene en_ jhan hare zoene en_ hebben gheloeft dese voerseide vorwarde vast en_ stedich te hauden en_ hebben verteghen op dat voerseide mudde rogghen / En_ jhan voerseit Enghelberen zoene voerseit heeft gheloeft Ghiselbrecht en sijnen broder voerseit / als hi tot sijnen mundighen daghen comen is dese voerseide vorwarde doene te hauden / en_ op dat voerseide mudde doen te vertiene / jn welker dinghe ghetuchenisse wi hebben onse zeghele aen dese letteren ghedaen / Ghegheuen jnt jaer ons heren doe men screyf dusent / + dri + hondert en_ Veirtich des zondaes na sente jhans baptists dach te midden~zomer naest volghende /