Corpus Van Reenen-Mulder (CRM14): Oorkonde L724r34101

. . Wi jhan Tielen zoen was van der mere van Cnechtsel ende herman die smit Scepene jn Oerle tughen dat voer ons is comen jhan Ghiselbrechts zoen van hokasterle en_ heeft vercocht en_ heeft gheliet en_ ghekent dat hi vercocht heeft voer hom voer sijne erfghenamen na hom en_ voer sijne nacomelinghe een mudde goets roghs met der gherechter maten van Oerle jhanne jhan culens zoen van mirde erflike en_ emm_meer alle jaer op onser vrouwen licht~misse als men kersen dreycht alsulken als Enghelberen Ghiselbrechts smoies docht_ was jhanne Ghiselbrechts zoen voerseit gaf met hare dochter te huwelike goede / te betalen en_ te ghelden / En_ dat jan Ghiselbrechts zoen van hokastelre voerseit heeft op~ghedraghen dat voerseide mudde roghs en_ die brieue met allen vorwarden die die brieuen begrijpen die jhan Ghiselbrecht voerseit ? van Enghelberen sijnre swegher op dat voerseide mudde roghs sprekende die die scepene van Oerle beseghelt hebben / jhanne culen zoen voerseit en_ heeft daer op verteghen tot behoef jhans culens zoen voerseit tot behoef sijnre erfghename_ na hom ende sijnre nacomelinghe / En_ jhan Ghiselbrechts zoen voerseit heeft gheloeft jhanne culens zoen voerseit alle die vorwarden te doen ghescien en_ te volvuren die die brieue begrijpt dien hi hom ouer heeft gheleuert van dien vorseiden mudde roghs / En_ jhan Ghiselbrechts zoen voerseit heeft gheloeft jhanne culens zoen voerseit dat voerseide mudde roghs te weren als men erue sculdich is te were_ ende alle voerco_mer af te doene / jn welker dinghe ghetuchenisse wi hebben onse seghele aen dese letteren ghedaen Ghegheuen jn den jaer ons heren doe men screyf dusent dri + hondert een en_ veirtich des sondaechs voer onser vrouwen misse te lateren ghegheuen