Corpus Van Reenen-Mulder (CRM14): Oorkonde L724r34202

. . Wi jhan happen sone was en_ herman die smit Scepene in oerle tughen / dat voer ons is comen heinric Mertens soen was van Oerle en_ heeft vercocht en_ heeft gheliet dat hi vercocht heeft voer hom voer sijn erfghenamen na hom en_ voer sijne nacomelinghe / jhanne / die soen is jhans gheheiten kulut van mirde / dertich scillinghe erflike en_ emmermeer alle iaer den voerseiden jhanne / sijnen erfghenamen na hom en_ sijne_ nacomelinghen / van heinric voerseit van sijnen erfghenamen na hom en_ van sijnen nacomelinghen / op onser vrouwen licht~misse als men kersen dreycht jn alsulkenen payment als alle iaer op dien voersprokenen dach jn borsen ghenghe en_ gheue is / te betalen en_ te ghelden En_ te heffen en_ te boren ute den huyse en_ ute den hoeue aen dien huyse gheleghen / dat heinrics mertens soens is voerseit / en_ ute dien dat daer aen dien huyse en_ hoeue is gheleghen / dat heinrics mertens soens is voerseit en_ dat gheleghen is binnen Oerle en_ ute enen ecker die men heit die stekels~ecker / die heinrics mertens soens is voerseit / En_ dat heinric voerseit heeft ghegheuen / den Goedshuyse van postele jn rechten aelmissen / twe scillinghe payments als ghemeenlike in borsen gheneghe is in borsen / erflike en_ emmermeer alle jaer op onser vrouwen licht~misse ute den voerseiden onderpande / te betalen / en_ te heffen / En_ dat heinric mertens soen heeft gheloeft Jhanne voerseit jhanne kuluts soen voerseit dat voersproken ghelt te weren jn dat voersproken onderpant erfliken / als men erue sculdich is te weren en_ alle voerco_mer af te doene / jn welker dinghe ghetuchenisse wi Scepene jn Oerle bouen ghenoemt hebben onse seghele aen dese letteren ghedaen / Ghegheuen jnt jaer ons heren als men scrijft dusent dri + hondert veirtich en_ twe des maendaechs voer vastellauont /