Corpus Van Reenen-Mulder (CRM14): Oorkonde L724r34203

. . Wi jhan gheheiten lewe van der heiden / en_ jhan Tielmans soen was van der mere van Cnechtsel Scepene jn Oerle / tughen / en_ doen cont en jgheliken die dese tieghenwerdighe letteren solen sien oft horen lesen / dat voer ons sijn comen / ghemeenlike die ghebure van der Prochien van Oerle / van Cnechtsel / van vessem / en_ van winterle en_ hebben alle hare / rechten die si hadden of mochten hebben ghehadt van ons heren . . Tshertoghen weghen van brabant van dien wieren die gheleghen sijn tusschen sande Oerle en_ vessem op der heiden / en_ die gheheiten sijn / dat staken~venne / en_ die ? / en_ die int wilt laghen tusschen die ghebure_ deser voerseider dorpe_ / aen die een side / en_ Godeuarde Marcelijs soen was van Oerle aen die ander side / ghegheuen en_ op~ghedraghen mit haren vrien wille / herren jhanne van den plasch Ridder scoutheit van den bossche / sijne_ erfghenamen na hom en_ sijnen nacomelinghen jn enen erfliken recht en_ tot eweliken daghen te hebben en_ te hauden / En_ dat Godeuart Marcelijs soen was voerseit heeft ghegheuen en_ op~ghedraghen / mit sijne_ vrien wille alle sijn rechten die hi hadde aen den voerghenoemde_ wieren / en_ alle rechten die hi hom vermat daer aen te hebben / herren jhanne van den plasch voerseit sijne_ erfghenamen na hom en_ sijnen nacomelinghen / jn enen erfliken recht en_ tot eweliken daghen te hebben en_ te hauden / Ende jn ghetuchnisse en_ orkonscappe van desen vorwarden voer~ghescreuen hebben wi Scepene jn Oerle bouen ghenoemt des tieghenwerdighe open letteren mit onsen seghelen beseghelt / Ghegheuen jn den jaer van der gheboerte ons heren als men scrijft dusent dri + hondert veirtich ende twe / een en_ twintich daghe in wedemaent / . .