Corpus Van Reenen-Mulder (CRM14): Oorkonde L724r34301

. . Wi jhan van der heiden van Cnechtsel en_ jhan Tielen soen was van der mere van Cnechtsel Scepene jn Oerle tughen dat voer ons sijn comen Gherart gheheiten ghent / heinric gheheiten van der heiden / Mathijs van der heiden / Michiel van der heiden voer hom en_ voer Arnes sijns broder kinder / jhan van den broechuse en_ didderic sijn soen hebben vercocht en_ hebben gheliet en_ ghekent dat si vercocht hebben ghesamender hant / voer hon voer hare erfghenamen na hon en_ voer hare nacomelinghe jn enen erfliken recht jhanne die soen was jhans gheheiten culut die meester is van den hoeue tot Oerle tot behoef / des Goedshuys van Postel / ene stucke beemts gheleghen jnt scoenbroke bi der mouke~broke van Postele te hauden en_ te hebben / En_ dat Gherart heinric mathijs / Michiel / voer hom / en_ voer Arnes sijns broder kinder jhan van den broechuyse en_ didderic voerseide hebben jhanne den Meester van den hoeue van Oerle voerseit tot behoef Shoefs des Goedshuys van Postel doen hoeuen en_ eruen ouermids shoefs hant / also als ghewoenlike en_ recht is in tijnsgoet / En_ hebben gheloeft ghesamender hant jhanne den Meester van den hoeue van Oerle voerseit tot behoef des Goeds~huys van Postele voerseit desen voerseide stucke beemts te weren als men erue mit recht sculdich is te weren en_ alle voerco_mer af te doene / En_ didderic jhans soen van broechuysen voerseit heeft gheloeft sijne_ broderen alle dese voerscreuen voerwarden stat te doen hauden / en_ te doen vertien op dat voerseide stucke beemts / jn orkonscape onser seghele aen dese letteren ghedaen / jn den jaer van der gheboert ons heren / dat men scrijft dusent dri + hondert veirtich en_ drie op grote vastelauont - -