Corpus Van Reenen-Mulder (CRM14): Oorkonde L724r34401

Wi jan happen sone was En_ Jan van + der mere van Cnechtsel Scepene in Oerle tughen dat voer ons is comen wouter die weuer van Elichem En heeft vercocht en_ gheliet en_ ghekent dat hi vercocht heeft voer hom voer sine erfghename na hom en_ voer sijne nacomelinghe ghisebrechten Mevis sone van vessem was tot sijne_ behoef sijnre erfghename na hom oft sijnre nacomelinghe twellef scillinghe payments also als op allen betaeldaghen ghenghe en_ gheue is Erflike en_ ommermere alle jaer namaels op sente Remeys dach te betalen en_ te ghelden En_ te heffen ute huys en_ hof en_ ute allen Erue dat wouter voerseit en_ Conegont sijn wijf was te~samen houdende waren in die prochie van Oerle . En_ wouter voerseit heeft oec gheliet en_ ghekent dat hi ghisebrechten voers_ in dit voers_ Erue voer desen voerseiden tijns heeft doen hoeue_ en_ Eruen ouermids hoefs banc also als ghewoenlike en_ Recht is in tijns~goet die wile dat Conegont sijn wijf louede en_ hi en_ si tesamen in ghehelen bedde saten En_ wouter voers_ heeft ghisebrechten voers_ desen voerghenoemden tijns in dit voerseide Erue gheloeft te weren op hom en_ op sijn goet als men Erue mit Recht sculdich is te weren En_ alle voerco_mer af te doen ute~ghenomen der heren tijns van + den gronde dat wouter voers_ dien ghelden sal als boede van ghisebrechts weghen voerseit . . jn Orkonscape onser seghele ghedaen aen desen letteren / Ghegheuen jn den jaer ons heren gheboert dusent dri + hondert veirtich en_ vier op dien seuenden dach van aprille .