Corpus Van Reenen-Mulder (CRM14): Oorkonde L724r34801

Wj herman die smit gheheiten der kinder / En_ jhan Tilen zoen was van der meer va_ knechtsel / Scepene in Oerle / tughen dat voer ons sijn comen wouter en_ didderic sijn vader van den Eynde / en_ hebben vercocht en_ hebben gheliet dat si vercocht hebben voer hon en_ voer hare erfghenamen na hon en_ voer hare nacomelinghe / jn enen eweliken en_ jn enen erfliken recht / jhan jhans culoits zoen was va_ mijrde sijnen erfghenamen na hom en_ sijnen nacomelinghe / twe mudde goets en_ gheefs rogghen met ter gherechter maten van Oerle / erflike en_ emmermeer alle jaer jhan voerseit sijnen erfghenamen na hom en_ sine_ nacomelinghe / op onser vrouwen licht~misse als men kersen boert te ghelden en_ te betalen / En_ te heffen en_ te boren vut enen deirdel van enen Erue dat gheleghen is te sittert in die prochghie van Oerle / dat wouter voerseit naeme met sijnen wiue / En_ wouter voerseit en_ didderic voerseit hebben gheloeft op hon en_ op alle hare goit / dat si hebben en_ dat hon weerden mach / en_ voer hon en_ voer hare erfghenamen na hon en_ voer hare nacomelinghe / jhan voerseit sijnen erfghenamen na hom en_ sijnen nacomelinghe / die voerseide twe mudde rogghen te weren jn dat voersproken erue als men Erue mit recht sculdich is te weren en_ alle voerco_mer en_ alle naerscap af te doen / En_ die borghen dien dit voersproken goit in hant was gheseit die hebben op dit voerghenoemde goit op vertheghen voer ons / Jn welker dinghe ghetuechnisse hebben wj dese litt_en mit onsen seghele beseghelt / ghegheuen jnt jaer ons h_en gheboert / doe men screef / dusent / + drie + hondert + / veirtich en_ acht op onser vrouwen misse ter later -