Corpus Van Reenen-Mulder (CRM14): Oorkonde L724r34803

Wj herman die smit gheheiten der kinder / En_ jhan Tilen zoen was van der meer van knechtsel / Scepene in Oerle / tughen dat voer ons is comen / jhan jhans culoits zoen was van mijrde / en_ heeft ouer~ghegheuen in gherechter aermisse voer hom en_ voer sijn erfghenamen na hom en_ voer sijn nacomelinghe / jn enen eweliken en_ jn enen erfliken recht / den goitshuese van Postel / twe mudde goets en_ gheefs rogghen met ter maten van Oerle / die jhan voerseit ghecocht heeft erflike thegen wout_en en_ diddericke sijnen vader van den Eynde jn deirdeel van enen Erue dat gheleghen is te sittert in die prochghie van Oerle dat wouter voerseit naeme met sijnen wiue / als soe als die Scepenebrief begripet en_ spreict die daer op ghemaict is / jn welker dinghe getuechnisse hebben wj dese litt_en mit onsen seghele beseghelt / ghegheuen jnt jaer ons heren doe men screef / Dusent drie + hondert / + veirtich en_ acht op seinte andries dach gheleghen in den winter