Corpus Van Reenen-Mulder (CRM14): Oorkonde L724r35401

Wi ihan van der meire van knechtsel / En_ herman die Smyt Scepene in Oerle tughe_ onder onse Seghelen / dat voer ons come_ is peter ihans gheheyte_ naghels zoen was en_ heeft erfelike te pacht ghegheue_ voer hom / en_ voer sijn erfghename_ nae hom Godeuarde godeuards gheheyten strixkens zoene tot sine_ behoef en_ sijnre erfghename_ nae hom / al alsolken erue met sine_ toebehoerten als peter voerseyt heeft verkreghen van den goede ten eynde / gheleghen in der p_rochien van oerle / soe wat erue dat is / eest ecker~lant oft heyde~velt / ouer achtyen loepe_ goeds rogghen / en_ gheefs / der gherechter maten van oerle syaers / alle iaer erflike / en_ o_mermere van godeuarde voerseyt / en_ van sine_ erfghename_ nae hom den voerseyden peteren / en_ sine_ erfghenamen nae hom / op onser vrouwen licht~misse / als men kersen bornt te ghelden / en_ te betalen En_ dat godeuart voerseyt / den voerseyden peteren / tonderpande gheset heeft / in den voerseyden erf~pacht / een strepe lands gheleghen in den raep~hof tussce_ peters gheheyte_ vlutmans erue van eenre siden / en_ tusscen erfenisse matheus marselius zoens was van zwart / En_ ene_ hof gheleghen tussce_ des voerseyde matheus erue va_ eenre siden / en_ tusscen ihans erue van den eynde van der anderre siden Een yeghelijc en_ al gheleghen in der p_rochien van oerle voerseyt / En_ dat godeuart voerseyt heeft gheloeft op hom / en_ op sijn goet / dese strepe lands / en_ desen hof voerseyt / tot ene_ onderpande / in den voerseyde_ erf~pacht te weren / als men erue met recht sculdich is te weren / En_ alle voerco_mer af te doen sonder der heren tsijns van den gronde / Ghegheue_ in den iaer ons heren / als men screef dusent drie + hondert vijftich en_ vier / op den neghenden dach in den Maerte