Corpus Van Reenen-Mulder (CRM14): Oorkonde L724r39301

Wij arnt heinrics keysers soen En_ jan maes soen was van den eynde Scepene jn Oerle tughen onder onse seghelen dat voer ons come_ sijn Rutgher van den dijc Enghebrecht van velthoue_ Maes comans van knechsel en_ heinric hasselmans En_ hebbe_ ghetuycht eendrechteliken als scepen_ op ho_en eedt bij manissen des Richters dat vo_e hon Jan spikerman als man onser lieuer en_ ghenedigh_ vrouwe_ van brabant Jan die volre als Scepene_ jan die hoghe peter v_en heylen soen arnt van den valgaet arnt van de_ beyart jan danels soen Mercelijs brant en_ heinric slonde tuychden eendrechteliken jn der vierscare_ jn Ene_ gheba_nen ghedinghe op ho_en eedt bij manissen des Richters dat allen die laet die op die twe goeden tot zonderwijc gheleghen En_ op die twee goeden tot kercoerle gheleghen die den goetshuys van postel toebeho_ende sijn daer Op ghezeten hebben tsestich jaer lanc en_ m_e van des goetshuys weghen van postel voerseyt En_ dat dat goetshuys van postel voerseit dese selue vier goeden voerseit ghehantpliet heeft tsestich jaer lanc en_ m_e als vo_e sijn Erue en_ nyement anders Jn ke_nisse der waerheit soe hebben wij Scepen_ boeue_ ghenoemt onse seghelen aen dese teghenwoerdighe l_ren ghehanghen jnt jaer doe me_ screef van der gheboert ons h_en dusent drie + hondert Tneghentich en_ drie Op den Vierden dach jn decembri .