Corpus Van Reenen-Mulder (CRM14): Oorkonde L728r30701

Wi Willem , riddre , here van Cranendonc ende Lisebet sijn witteghe wijf alle die nu sijn ende die ?och comen sulle? die desen brief sullen sien of horen lesen salut ende kennesse der waerheit . Hen allen si cont dat wi onse? ? vrienden onsen luden van onsen dorpe van Woensel om onser baten wille ende om haren kenliken orbore hebben vercocht w? ende witteleke alle die ghemeintte tuschen den termen of den palen die gheteikent sijn beneven onsen ghenoemden dorpe van Woensele van der ere side ende dat bosch dat men heet Achte van der ander side , also als si strect in elken ende in also velen als onse gherichte vulcomelike dat besleet , dat die onse vorseide lude van onsen dorpe van Woensel ende hare nacomende sullen behauden erfleke te nuttene ende te orborne in weiden ende in alrehande vruchte ende nutscap van dier vorseider ghemeintte en? ? den ghemeinen orbore onser lude vorseit , ende dat es te wetene om ene sekere summe ? penninghen , hondert pont ende vijftig swa? ? (onleesbaar) ? ? ? ? ? ? eerste coops ende die ons betaelt sijn ende in onsen orbore ghekeert , ende vort om een sjaerleken ? ? ?ns van sesse p? ? tornoise , enen groten tornoisen conings ouden vor sestien penninghe of enen swarten tornoisen vor ? penning , ?m den vorseiden chens te betaelne ons ende die na ons comen sullen onsen erfghenamen ende te gheldene van onsen vorseiden luden ons ?ps van Woensel elcs jaers up sente Martijns daghe in den winter ende dien chens s?len onse lude? betalen ende ghelden in ?se ghenoemde dorp te Woensel van der vorseider ghemeintten ; bi al sulker voreworden dat ? ?i noch onse erfghenamene noch onse nacomende gheen deel van dier vorseider ghemeintte sullen vercopen eneghen luden of iemene te chense gheven , noch en sullen ?ghen vercopen noch gheven moghen te chense , noch in enegher manieren ontkeren ; mar onse vorseide lude van onsen dorpe ? Woensele sullen die ghemeintte behauden te haren ghemeinen orbore ghelijc hir voren ghescreven staet , behalven enen deele der ghemeintte die gheleghen es binnen den vorseiden terme of palen beneven onse vorseide dorp die ten dorpe wart ane leghet , also als dat deel gheteikent es ende bewiset ; in den welken deele wi sullen moghen vercopen , gheven ende ute~gheven te onsen orbore hofstaden dier behoeven ende dier na staen sullen , bi rade onser lude van Woensel vorseit . Ende oec dat vremde lude van buten die niet en sijn ghesellen noch deelnemers onser lude van Woensele in die ghemeintte ende die haren ? van der eerster summe der panninghe noch van den chense niet ghegouden en hebben noch ghegheven , die en sullen in gheenre manieren nutten moghen noch orboren noch en sullen sculdich wesen te beeschene die vorseide ghemeintte ; die welke vremde en die hare anedeel niet gheven en hebben van den eersten ghelde noch van den chense , die scheide wi af van der nutscap ende van der vrucht ende van der ghedeele der vorseider ghemeintte ende sullen af~scheiden ende af~wisen . Ware oec dat sake dat iemene van buten ?oude comen onder ons woenen in onse dorp ? Woensel vorseit , hi mochte orboren ende nutten die vorseide ghemeintte , in dien dat hi gave sijn anedeel van den ersten cope ende van den chense , ghelijc onse andre lude ghedaen hebben van onsen dorpe te Woensele . Vort sulwi setten in dier vorseider ghemeintte enen ghewareghen scuttere , die alle der vremder ende elcs van buten quic ende beesten die begrepen worden in dien ganc ende in den begripe der vorseider ghemeintten sal scutten ende arresteren ; ende der gherre die hare anedeel , eist van den eersten cope , est van den jaer~chense , niet ghegholden en hebben , ende die orboren wouden die ghemeintte , sal hi des ghelijc scutten ende arresteren . Ende dar of sal die vorseide scuttere nemen van elken scutte vijf scellinghe : des sullen die drie scellinghe ? ?behoren , here van Cranendonc , ende dandre twe sal die scuttere behauden vor die brueke . Oec hebwi gheven ? ? ?an Woensel vrie nutscap in watre ? ? ? ? ? ?eintte bi dandre side des ?schs van Achte ? ?est ? also verre ? onse ghe? dar strect (onleesbaar) (onleesbaar) (onleesbaar) wat ute~gheven wouden ende onse orboren dar mede doen , wi of onse erfgh?en of wijs den worde te rade . En? in dese vorseide ghemeintte ende in die vrome dar af beloven wi onse lude vorseit van Woensel met goeder truwen van elken man te bevredene ende te bescermene van onser weghen ende die na ons comen sullen , ende dat wi hem dese vorworden elke ende al houden sullen onghescort ende onghebroken ende dat wi daer jeghen niet gaen en sullen noch doen , noch niemen van onser wesen? of die na ons comen sullen . Ende want wi willen dat dese dinc vast blive onsen luden vorseit ende eweleke durende , hebwi onse seghele ghehanghen an desen jeghenwordeghen brieve . Dit was ghedaen int jaer ons Heren dusentich drie + hondert ende sevene , up sente Lambrechts daghe .