Corpus Van Reenen-Mulder (CRM14): Oorkonde L728r33701

Mertijn kenens zoen was van lumel en_ luetgardt sijne wijf met haren mo_bore dien si coes en_ dien hare de Richter gaf bi vonnis der . . scepene sijn comen voer ons ende hebben vercocht en_ hebbe_ gheliet en_ ghekent dat si vercocht hebben / Didderic gheheiten stockelman Porter van Endouen drie pont / den auden groten tornoysen der munten . . Sconincs van vrancrike voer sestien penninghe in desen gherekent of dweerghelt daer tieghen / erflike en_ emmermeer alle jaer voer hon voer hare erfghenamen na hon en_ voer hare nacomelinghe / den voergheseiden didderic sijne_ erfghenamen na hom en_ sijne_ nacomelinghen / op onser vrouwen dach als men kersen bernt dat me_ heit sente marien licht~misse binne_ Endouen te betalen ende te ghelden / uter husinghen en_ uter houinghen met sijnre toebehoerte dat herren jhans van Eyke was / ende dat her Aebrecht die p_soen van Eyke nu haudende is van Mertijn voerseit / ute enen die bi die molen is gheleghen en_ ute enen stucke lands dat gheleghen is tusschen eyke en_ (onleesbaar) / dat luetgarden voerseit heeft van haren vader ende dat tieghen jordaens ponders lant ouer is gheleghen . Voert hebben Mertijn ende luetgart voerghenoemde gheliet ende ghekent dat si didderic voerseit hebben gheloeft ende gheerft in dat voerseide onderpant voer drie scillinghe tot der heren tijns / ende als voer jhan gheheiten smale / ende heinric willem zoen van domellen / den voerghenoemde didderic alle voerco_mer ende naerscap af te doen / ende der heren tijns te ghelden van didderics weghen en_ jn sijnen name / alsoe dicke / wo dicke / waer / wiem en_ wanneer men sculdich en_ behoerlijc is te ghelden / jn welker dinghe ghetuechghenisse / wi wouter wouters zoen en_ Mertijn de vleeschhouwer Scepene jn Endouen hebben onse zeghele doen hanghen aen den tieghenwerdighen letteren / Ghegheuen jnt jaer ons . . heren doe men screef Dusentich dri + hondertich zeuen en_ dertich des donredaes na beloken pinxten