Corpus Van Reenen-Mulder (CRM14): Oorkonde L728r34201

Wi didderic gheheiten stockelman en_ willem Roefs misekens soen was Scepene Jn Endouen / tughen / dat voer ons is comen heinric heilwighen soen van Oyrle / en_ heeft vercocht en_ heeft gheliet en_ ghekent dat hi vercocht heeft voer hem voer sijne erfghenamen na hem en_ voer @ sijne nacomelinghe . Jhanne hessels soene van Gheruwen Jn enen erfliken en_ in enen eweliken recht / veirtich scillinghe payments als ghe~meenlike Jn borsen gheet erflijcs en_ Jaerlijcs tijns / welke veirtich scillinghe voerseide heinric voerseit heeft gheloeft voer hem voer sijne @ erfghenamen na hem en_ voer sijne nacomelinghe Jhanne voerseit sijnen erfghenamen na hem en_ sijnen nacomelinghen erflike en_ @ emmermeer alle Jaer op onser vrouwen licht~misse als men kersen dreycht te betalen en_ te ghelden / En_ te heffen en_ te boren ute @ heinrics huyse voerseit ute den hoeue en_ ute den gheboect dat gheleghen is aen dien huyse mit en Jgheliken en_ mit allen sijnen @ toebehoerten / ute enen stucke lands dat men heit dwier~stucke / dat neuen den wier is gheleghen / En_ ute enen houeken dat had @ gheweist didderics voren Erken soens / en_ dat is gheleghen bi diddekens van den laere / Jn die prochie van Gheruwen / En_ dat @ heinric voerseit heeft gheloeft Jhanne voerseit dese voersproken veirtich scillinghe Jaerlijcs tijns te weren Jn dese voerseide er~fenisse als men erue sculdich is te weren / en_ alle dat te doene dat men mit recht van erue sculdich is te doene / En_ in ghetu~chenisse en_ orkonscape van desen vorwarden voerscreuen hebbe wi dese letteren mit onsen seghelen beseghelt / Ghegheuen Jn den @ Jaer van der gheborte ons heren als men scrijft dusent dri + hondert veirtich en_ twe / op sinte bartholomeus dach .