Corpus Van Reenen-Mulder (CRM14): Oorkonde L728r34301

Wi jhan gheheiten haese en_ willem Roefs nusekens soen was / Scepene jn Endouen tughen dat voer ons sijn comen / Erke heinrics kuysts wijf was en_ heinric hare soen en_ hebben ouer~ghegheuen den Meester van Postele tot behoef Sgoedshuys van Postele / jn ene_ erfliken recht te hebben en_ te bruken Achtien lopen roghs erfspachts / die erke en_ heinric / en_ haer ander kinder hadden jaerlijcs gheldende / aen Ghisebrechten gheheiten jonghe Ghibe van den broke Ekerijns soen was mit allen dien brieuen die Erke en_ heinric hare soen voerseide op die voerseide Achtien lopen roghs hadde sprekende mit allen dien vorwarden die die brieue jn~hebben en_ begripen en_ mit allen dien recht dat si daer aen hadden / jn enen rechten wissele om Achtien lopen roghs erfs~pachts die katelinen van reckoeuen hadde gheweist / en_ die heinric kuyst voermaels en_ Erke en_ hare kindere katelinen voerseit plaghen te ghelden en_ sculdich waren ute enen ecker gheheiten die paddenpoele gheleghen jn die prochie van wonsele dien Erke en_ hare kinder noch haudende sijn en_ hebben / Ende Erke en_ heinric hare soen voerseide hebben gheloeft den Meester van Postele voerseit tot behoef Sgoedshuys van Postele die voersproken Achtien lopen roghs erfs~pachts te weren als men erue mit recht sculdich is te weren en_ alle_ voerco_mer af te doene / jn orkonscape onser seghele hanghende aen desen letteren Ghegheuen jn den jaer van der gheboert ons heren / dusent / + dri + hondert veirtich en_ drie des maendaechs voer sinte bartholomeus dach - - -