Corpus Van Reenen-Mulder (CRM14): Oorkonde L728r35201

Wi merten die vleysch~houwer / En_ Peter bartolomeus zoen was Scepen_ in Endoue_ tughen onder onsen Seghelen dat voer ons comen is willem roefs zoen was van endoue_ / en_ heeft alsolken vijftien scillinghe payments syaers als men hem iaerlijcs op onser vrouwe_ dach hoerre gheboerte gheldende was vte ene_ heyde~velde gheheyte_ lanclaer / vte der beteringhe van ene_ stucke lands gheheyte_ bokenstuc / En_ van ene_ huse dat aen dat voerseyde stucke lands steet / dat is te wete_ vte dien dat / dat beter is / dan tyen scillinghe syaers / en_ der here_ tijns / dat men daer iaerlijcs vte ghilt als hi seyde / En_ vte ene_ beemdeke_ dat daer bi gheleghe_ is daer me_ een voeder hoys op meyt als hi seyde / welke voerscreue_ erfenisse gheleghe_ sijn in der prochghien va_ gheruwe_ ghelijc als die Scepe_~lettere_ begripe_ die tot endoue_ daer op ghemaect sijn / erfelike vercoft voer hom / en_ voer sijn erfghename_ nae hom / ihan hessels zoene van den broeke van gheruwe_ tot sine_ behoef en_ sijnre erfghename_ nae hom / En_ dat willem voerseyt heeft gheloeft / op hom en_ op sijn goet / ihan voerseyt en_ sine_ erfghename_ nae hom / dese voerseyde vijftien scillinghe syaers / in dese voerscreue_ erfenisse / en_ beteringhe te were_ als men erue met recht sculdich is te were_ / en_ alle voerco_mer af te doen / sonder der here_ tijns Ghegheue_ in den iaer ons here_ Dusent drie + hondert vijftich en_ twe op den neghe_ en_ twentichste_ dach in den Meye .