Corpus Van Reenen-Mulder (CRM14): Oorkonde L728r38601

Wij heinric heinrics soen was / ende kerstiaen kerstiaens soen was / Scepenne in Eindouen tughen ond_ onsen seghelen dat voer ons comen js Rutgher moedels soen was van + der doncke / Ende heeft die selue Neghentien mudde rogghen jaerlijcs ende erflijcs pachts der gherechter maten van woensel die hoem Didderic arnts pardelders soen was sculdich was te ghelden erfliken ende vmmermere op onser vrouwen licht~misse als men kersen bernt / Dat js te weten vte enen Guede dat gheleghen js binnen woensel met allen sinen t˚ebehoerten / met lande met beemden met huysinghen ende met hoeuinghen / soe waer dat gheleghen js / jn dyepen ende jn droeghen Vte~ghesceyden alsulkenen tsijns syaers / ende erf~hoenre als Rutgher voers_ gheldende heeft binnen woensel / welke Guet voers_ des voers_ Rutghers te wesen plach / Ende dit js al te verstaen ghelijc als der scepenne litt_en van Eindouen begripen ende in~hauden die daer op ghemaect sijn / Ghegheuen ende op~ghedraghen jn huwelijcker vorwarden ende guedinghen voer hoem ende voer sijn erfghenamen na hoem Ghisebrecht van + den doerne sinen swaghere tot sinen behoef ende Marien sijns wijfs behoef des seluen Rutghers dochter / ende hoerre erfghenamen na hoen / met allen dien rechten vorwarden ende brieuen / Daer hi die voersproken Neghentien mudde rogghen erfs~pachts mede ghecreghen hadde ende mede hebbende was / Ende heeft daer helmelinghen op verteghen tot eweghen daghen tot behoef Ghisebrechts ende Marien voerghenoemt / Ende dat die voersproken Rutgher heeft gheloeft op hoem ende op alle sijn guet voer hoem en_ voer sijn erfghenamen / Ghisebrechte voerghenoemt / Ende dat die voersproken Rutgher heeft gheloeft op hoem ende op alle sijn guet voer hoem en_ voer sijn erfghenamen / Ghisebrechte voerghenoemt / allen voercommer van + den voers_ Neghentien mudde rogghen erfs~pachts af + te + doen / Dien hi daer op ghemaect heeft / ende die van sijnre weghen daer op comen mach / Ghegheuen jn den jare ons h_en doen men screyf dusent drie + hond_t tachtentich ende sesse des dertiende daghes in februario -