Corpus Van Reenen-Mulder (CRM14): Oorkonde L757r34501

Wi Godeuart van linnel / jhan hammans soen / art gheheiten haerren / willem grabbart jacob bierman heinric van den eyken en_ diederic nesen soen / Scepene in waderle en_ in wedert / tughen en_ maken cont en jgheliken / dat voer ons sijn come_ Art vdemans soen was en_ willem sijn broder / Eelsbe / Margarite / lisabeth en_ heilwich ghesusteren des vorseide vdemans kinder met hare_ mo_bere die ho_ die Richt_ gaf mit vo_nis en_ mit recht en_ hebben vercocht en_ ghekent dat si vercocht hebben / jn ene_ erfeliken recht jhanne gheheiten linnelman ene_ beemt gheleghen aen die molenstat / mit der heiden die daer voer is gheleghen also uerre_ alst vdeman voerseit toe~behoren plach / En_ hebben dien voerseiden beemt mit der heiden / jhan voerseit opghedraghen en_ daer op verteghen / en_ daer jn doen hoeuen en_ eruen mit Shoefs hant en_ mit vo_nis / also als ghewoenlike en_ recht was in tijnsgoet / Voert~meere hebben gheloeft art willem / Elsbe / Margarite lisabeth en_ heilwijch ghesusteren vdemans kinder voerseit mit haren mo_bore jhanne voerseit dien voerseiden beemt mit der heiden te weren als men erue mit recht sculdich is te weren / en_ alle voerco_mer af te doene / jn welker dinghe ghetuchenisse wi Scepene bouen ghenoemt hebben onsen ghemeynen seghele ons scependoms van waderle en_ va_ wedart aen dese lett_en ghedaen / jnt jaer ons heren gheboert doe men screyf dusent dri + hondert veirtich en_ vieue / op sinte seruaes auont . .