Corpus Van Reenen-Mulder (CRM14): Oorkonde L853r38501

Wi joha_s mychiels scouteyt En_ peter dauijds / Moers vercone_ / jan bogarts / jan truden / moens van der locht / kerstyaen kerstiaens En_ heynric meus Schepene_ in die banc van Echsele / tughen ou_mids dese_ teghe_werdeghe_ brief / dat vor ons come_ sijn met horen goiden wille en_ onbedwonghen van yeman godeuart die gheheite_ es ryccart En_ Maria sijn suster en_ heynric hor wetteghe mu_bar / En_ mynta godeuarts suster En_ arnout hor wetteghe mu_bar En_ hebbe_ ghesamender hant en_ onghescheiden ouer~ghegheue_ en_ op~ghedraghen br˚eder Clause van den rode ondermeester tot postel tot behoef des gods~huys van postel En_ hebbe_ helmelinghe verteghe_ met allen den rechte als die banc va_ Echsele gheleghe_ es en_ te rechte steet / vor hon en_ vor hore erfghename_ en_ nacomelinghe_ na hon tot ewelike_ daghe_ come_de / op alsulken erfenisse / als hon van Godeuarde va_ peelte hore_ ouder~vader verstorue_ mocht wesen En_ jan alfenhoet hor vader in ghericht soude sijn als si seiden / welc erfenisse gheleghen es in die prochye va_ Eykelberghe En_ es gheheite_ die portinc welc erfenisse dat gods~huys va_ postel vors_ voretijts teghen den vorg_ godeuarde va_ peelte ghecreghen hadde / En_ godeuart ryccart en_ sine sustren met horen wetteghe_ mu_bare_ vors_ hebben quijt ghescoude_ dat vorg_ gods~huys va_ postel van allen richten va_ allen heyschinghe_ en_ va_ alle_ saken die si of hore erfghename_ den vors_ gods~huse va_ postel tot op den dach va_ huden tot ewelike_ daghen heysche_ of tyen mochte_ welc ou_gheue_ / opdraghe_ / vertyennisse en_ quitantie dese vors_ godeuart en_ sine sustren met horen wetteghen mu_bare_ hebbe_ gheloeft vor hon en_ vor hore erfghename_ na hon En_ yeghelijc vor al / op hon en_ op alle hore goede die si nu ter tijt hebbe_ of ommermeer vercrighen moghen vast en_ stedich te houde_ tot eweliken daghen / altoes arghelist en_ nuwe vonde in allen desen saken vutghesloten jn orconde_ der wareyt alre sake_ vors_ so hebbe_ wi vorg_ Schepene_ onse_ seghel des ghemeins schepenambachs va_ Echsel gheha_ghen aen dese_ opene_ brief / Die ghegheue_ es en_ ghescreue_ jn den iare ons h_en na sine gheborte doe me_ screef dusent drie + hondert tachte_tich en_ viue des goensdaechs na sente dyonijs dach in Octobri / die gheheite_ es Roselmaent