Corpus Van Reenen-Mulder (CRM14): Oorkonde L872r38501

Wijr Reyner thorijs als meyer / Tilman gobbelen + soen / Johannes van der borch . / heynricke van den ende / en_ wouter gerarts soen was van Schavanen als Scepen des Abts van Averbode in sijnen hoef tsent~jans~berghe / doen . tsamen kont alle_ lueden mit grueten / dat voer ons komen ende verschene_ is / eyn wijttich bescheiden man geheiten gyle van den venne / en_ heeft voer ons geliet ende bekant dat hee mit gueden voerrade / in wijtliker coume_scaep vercocht heeft / eyn mauder rogghen eerfs~pachs der maten van Eyk guyts weers pachs / widghen bescheiden lueden / Te weten h_en jan sprengher prister / en_ heynric symans soen was des bartscheres / als bruder~meyster en_ p_visoer onser liver vrouwen bruderscaep tot eyk / in orber / ende behoef der bruderscaep vors_ / hoen / of wij sij sijn solen / in der tijt die kome_ sal / jaerlix ewelike en_ vmm_me / te betalen op seent andrys daghe des heylghen Apostolen / ende te liv_en / hoen / ouch wij die en ter tijt solen siin / loes / ende ledich / van allen aen~spraken / in der Stat van Eyk in eyn huys woer sij dat verkisen / op kost / anxt / en_ arbeyt gilen vors_ / of sijnre erfname_ / voer wilghen vors_ pacht / die voers_ bruder~meyst_ / wael ende witlich betaelt hebben tweelf / gueder swaerre gulden / guyt / ende recht van goude / ende van ghewicht / of hoer valoer / in and_en gueden goude / woer by dat gile vors_ / die bruder~meyster vors_ / ende die na hoen o_m__me siin solen / dan af quijt gescouden heeft / Ende om den bruder~Meyst_en vors_ / en behoef / en_ orber onser vrouwen / en_ hoer nacomelinghen guet sekernisse te doen van desen eerfpacht so heeft gyle / vors_ / hoen daer voer gueden onderpant gesaet / Te weten eyn haelf bonre lans artackers wenich me of me_ gelegen op hamont / en_ reyne_de / aen eyn sijde aen Truden lant die wijf was heynrix haex / en_ aen die ander sijde / aen peters lant Sykens / van wilghen vors_ onderpande / gyle vors_ / sich ende siin erfname_ ontguyt heeft en_ onteerft / ende heeft die bruder~meyst_ en behoef onser vrouwen vors_ / daer in doen gueden en_ erven / voer desen erfpacht / en_ dat mit al den recht als des hoefs recht geleghen was beheltenisse mallix voer sijns rechts / Jn alsulker vughen / en_ maniren / oft vile des niet siin en moet dat gyle vors_ / of sijn erfname_ gebreclick worden aen betalinghen des vors_ pachs / des niet siin en moet / aen al of aen eynghe_ deile / of aen eynghen and_en vurw_den / dat dan die brudermeyst_ vors_ / of / die in der tijt sijn solen / aen moghen tasten desen vors_ onderpant hoeren wille / daer mede te doen / als mit and_en hoeren guede / dat onser vrouwe_ bruderscap tu~behoerende were / ende dat mit al den recht als daer recht tu wesen sal / beheltenisse voer mallix sijns rechts / ende dat sonder ymans wed_~spreken van weem dat were / Al arglijst in desen saken vytghesceiden / in orkonde der waerheit op~dat sij vast en_ stedich bliven / so heb wijr Scepen des hoefs vors_ / om aenbrenghen / Tilmans joh_es / heynrix / en_ vouters / ende ouch om beide_ wille beider p_tien / onsen ghemeyne_ Scepedoems syghel aen desen brief gehanghen / jnt jaer ons h_en du men screyf dusent / + dry + hond_t tachtentich en_ vyve / des anderen dachs in februario . .