Corpus Van Reenen-Mulder (CRM14): Oorkonde L874r37501

Wyr Margrite van heynsb_gh by der ghenaden goeds . . Abdisse der kirken van Thoren duyn kont allen luden dye desen brief solen zien of hoeren lesen / dat vor ons / en_ onse ma_ne te + weten ys / heynrich van Osen / Coen r˚est van gheen ende johan van der straten / jan wyricks / en_ heynric heysterman / komen en_ verschene_ ys / Symon van strobeke gheheyte_ scoutken met openen brieue_ / bezighelt met zighelen der Abdissen en_ des Co_uents des Cloesters van sent Claren tot Colen / en_ heeft verzuycht als mu_bor vrouwe_ heylwighe_ van beechoue_ suster des vurscr_ Cloesters vant sent Claren van on ontfanghenre hant tontfaen alsullich leen als vrouwe heylwighen va_ beechoue_ vurscr_ aen~ghestorue_ was en_ ys na dode vrouwe yden h_en wijnants vrouwe_ was van dyeteren / willich leen haldende ys in der maeten zesteen b˚enre luttif meer of men so in naten so in droghen / en_ ghehorende ys in den hoef tot papenhoue_ / En_ wir den vurscr_ Symon dat v˚rscr_ guyt ende leen erleent haue_ als mu_ber der vurscr_ vrouwe_ heylwighen / beheltenis / ons / ons goetshuys van Thoren en_ alre manlec zijns rechts met allen recht en_ ghewoenden als daer toe behorende was en_ ys / na wysen onser ma_ne vurscr_ / Voert ys kome_ op dy selue tijt vor ons . . Abdisse vurscr_ en_ onse vurghenoemde man dye v˚rscr_ Symon als mu_ber vrouwe_ heylwighen v˚rscr_ en_ heeft opghedraghen van desen v˚rscr_ leene in onse hant tot behüef sunter Claes elters gheleghe_ in der kirken tsent gheerlake / derde + half b˚enre lants / gheleghen voer hodrijsch by die strate in der h_en weert / jn wilghe derde + half b˚enre lants vurscr_ wyr voert ghequyt hauen tot behüef des vurscr_ Elters h_en Godard van dwerhaghen prister ghelijck als onse vurscr_ ma_ne wijsde_ dat recht were en_ ghewuende / Jn ghetugenis der waerheit so heb wir Abdisse vurscr_ onse p_per zyghel met zyghelen onser ma_ne onderghescreuen aen desen tieghe_werdghen brief duyn hancghe_ / En_ want wir jan van der straten / jan wyrics / en_ heynric heysterman vurgh_ egheyn p_per zyghel en hebben / so heb wir ghebede_ zyghels heynrics van Osen en_ Coene_ r˚est vurscr_ / En_ wir heynric en_ Coen vurscr_ om bede_ wille onser vurscr_ medemanne / so heb wir in ghetughenis alle deser vuerscr_ zaken voer ons en_ voer hoen onse p_per zyghele met zyghel onser liuer vrouwe_ der Abdissen vurscr_ aen desen tieghe_werdghe_ brief duyn hancghen Gegheue_ int jaer ons h_en / dusent + / drie + hondert + / vijf en_ tseue_tich / des viefteende daechs in den hoymaent .