Corpus Van Reenen-Mulder (CRM14): Oorkonde O061p37001

Wij scepenen van aelst . . wouter van scoubrouc . . Cornillis alis? . . jan terpenninc . . Ende heynric de vremde Doen te wetene allen lieden dat Gillis van den kerchoue heeft ghecocht ende ghecreghen wettelec Redelec ende wel vergolden / jeghen de voochde / van Claren gillis kinde was van helaer . bij den concente van scepenen alse ouer voochde . ende bij den Rade van sfoerseits kints maghen ende vrienden . Eenen scilt siaers erfeleker Renten . ofte vier + en + twintich gro_ ouer de werdde vlaendescher munten . te gheldene telken sente jans messe jn Midden~zomere . Ende desen uors_ scilt hebben de uorgh_ voochde in den Name van den uors_ kinde . gheassigneert bewiist ende beset gillise van den kerchoue uors_ opt huus ende erue dat jans van helaer was . ghestaen en_ gheleghen in de nustrate van voren tot acht_ tusschen jan boysts huus ende erue ande deen side ende pieters van oeten ane dander side / Ende de uorgh_ voochde hebben desen uors_ scilt erfeleker renten wettelec op~ghedreghen scepene_ in handen . ende hem daer af onth? en_ ontherft in den Name van den uors_ kinde Ende gillis van den kerchoue uors_ essere toe comen ende in gheherft wel ende wettelec na costume ende vsage van der poort van aelst Ende ware dat sake . dat gillis uors_ siin hoyr ofte nacomers niet betaelt en waren van den uors_ scilde erfeleker Renten elx jaers eweleke duerende telken uors_ daghe . so mochte . gillis uors_ siin hoyr ofte nacomers hant slaen ane tfoerseide wettelec bewiis en_ assignament . ende dat houden gheliic haren propren erue . vort so hebben de uoochde van den uors_ kinde hande ten heyleghen wert ghekeert en_ ghezworen gheliic datter toe behoert dat sij selfs ghedaen souden hebben al hadt haer sake gheweist ende dat siis daden de saken ou_zien den co_mer ende den last van den uors_ kinde . dat sijt daden om dmeeste profiit ende behout van den uors_ kinde . . jn kennessen der waerheit ende wt beden ende versouke van partien so hebben wij scepenen vorgh_ dese l_ren gheseghelt met onsen propren zeglen wthanghende jnt jaer ons heeren alse men screef . dusentech drie + hondert zeuentech te half hoymaende .