Corpus Van Reenen-Mulder (CRM14): Oorkonde O061p37401

Wij scepenen van aelst woutre van scoubrouc ende Gillis van den walle doen te wetene allen lieden dat boudiin de boc heeft ghecocht ende ghecreghen wetteleke redeleke ende wel vergolden jeghen janne heins die men heet jan metten hare / ende jeghen allicen siin wetteghe wiif / vier + en + twintich grote siaers vlaenderscher munten alsel? ghelts alse de graue van vlaenderen jaerlix sal doen ontfaen van siere erfeleker Renten Te gheldene te sente Martii_s messe in den winter jnt jaer ons heeren alse men sal scriuen dertien + hondert viu + en + zeuentich / ende dan al + u_golden te sine met ghereeden ghelde . ende also vort~ane telken sente martiins messe eeweleke duerende / Ende dese voernoemde vier + en + twintich gro_ erfeleker renten / hebben jan en_ allice siin wetteghe wiif vorgh_ wetteleke beset en_ bewiist op haer huus ende erue ghestaen ende gheleghen in de nustrate tusschen willems van den merssche huus ende erue an deen side . en_ boudiin boyst an dander side en_ jan en_ allice siin wetteghe wiif vorgh_ hebben dit voernoemde wetteghe bewiis wetteleke op~ghedreghen scepenen in handen om boudine den boc vors_ ofte sine_ nacomers elx jaers telke_ vors_ daghe eeweleke duerende dese voernoemde erfeleke rente an te verhaelne en_ te ghereekene jn kennessen der waerheit en_ vte beden en_ versoeke van partyen so hebben wij scepene_ voergh_ dese l_ren gheseghelt met onsen huuthanghenden zeghelen jnt jaer ons he_en alse men screef dusentech . + drie + hondert vier + en + zeuentech den achtienden dach in octobre