Corpus Van Reenen-Mulder (CRM14): Oorkonde O152p36101

het sii cont alle_ denghene_ die siin En_ sele_ siin dat gilliis de zagh_e dien men heet brekescilt heeft ghenomen teenen Erfeleken tseinse jeghe_ den h_ janne vanden berghe op dien tiit ontfangh_e Miins h_en va_ Nieneue va_ de_ goede va_ Nieneue vors_ Eene hofstat Tien Roeden en_ eene halue groet lettel men of meer vanden Erue dat der slachmoelen plach toe te hoerne En_ bi wille en_ consente van Miin h_e van Nieneue vors_ welke hofstat dat gheleghe_ es tusschen den huise dat der slachmoele_ toehoert en_ den weghe die ghaet t_ vors_ slachmole_ weert / Omme Tien Capune en_ eenen haluen tsiaers Erfeleker Rente_ alsoe sulke alse men jaerliix ontfaen sal van Miins h_en van Nieneue andere_ ouden Erfeleke_ Rente_ En_ die eewelec te betaelne te kerssauonde en_ altoes te dertiendaghe naest volghe_de v_goude_ te sine / Voert soe heeft de vors_ Gilliis wel besproken / dat hi en_ sine nacomers den berch vander vesten an dese vors_ hofstat gheleghe_ sele_ moghe_ beheymen en_ daer mede al haren p_fiit doen teeweleken daghe_ tote den cante vand_ deuren hen ware ochts de poert te doene hadde en_ mense daer veruasten wilde En_ soe welken tiit dat gheuiele dat de poert Gill_ ochte sinen nacomers vand_ vesten vors_ ochte van sier hofstat om de poert te v_uastene eenech belet eeneghe scade ochte eenech onghebruic daden soe soude dat de poert Gill_ vors_ en_ sine_ Nacomers v_oersate_ moeten ten goetdinkene vander wet va_ Nieneue En_ dit heeft de vors_ h_ jan den voerghen_ Gill_ en_ sine_ Nacomers gheconsenteert / Voert soe es te wetene dat wille_ de baers van deser vors_ hofstat jeghe_ den vors_ Gillise heeft ghenome_ teenen Erfeleken tseinse eene placke van viif Roeden groet / om achte Capune tsiaers van den welcken achte Capune_ de vors_ willem ou_ he_ en_ ou_ sine Nacomers gillise den sagh_e vors_ en_ sine Nacomers heeft gheloeft te q_tene elcs jaers costeloes en_ scadeloes jeghe_ Miin h_e van Nieneue jn mendernessen van sier Renten vors_ op al dat hi heeft ochte ghecrighe_ sal hi en_ sine Nacomers beede haue en_ erue En_ om~dat alle dese vors_ vorwarden vaste ghehouden sele_ bliue_ soe es hier toe al ghesciet datte_ bi wette sculdech was toe te ghesciene En_ waren hier + ou_ michiel de boeue alse bailliu En_ alse scepene_ jan de dun Gilliis bosschaert Gilius de meest_ en_ jan van aspelaer dit was ghedaen jnt jaer ons h_en doeme_ screef dusentech drie + hondert een en_ tsestech den anderen dach van brachmaent