Corpus Van Reenen-Mulder (CRM14): Oorkonde O162p32901

Allen den ghenen die dese lettren Selen Sien ochte hoeren lesen . Wij Schepenen van der poert van assche Saluit met kinnessen der waerheit . wij doen vors_ cont en_ kinlech . Dat gillijs dien men hiet stecke van vlesenbeke . heeft ghecocht en_ vercreghen wettelech en_ wale . jeghen jacoppe wilen was jans cher pouwels zone van assche . vijftech scellinghe pe_ninghe tsiaers erfeleechs cheins en_ eeweleechs . jaerlijcs en_ alle jare te gheldene jn Sente jans daghe baptiste jn Midden den zomere . en_ Met alsoe Selken paymente alse dan ghemienleech jn borse Sal gaen . Vore den welken vorghenoemden cheins . de vorseide jacop heeft beset en_ bewijst den vorseiden gillise teenen wettenghen pande . die ene helecht van Sire hofstat met allen haren toe~behoringhen die gheleghen es tassche ane de merct . en_ die zide te jans ghelaghe weert tsmermans en_ heinrecs gillijs ghelaghe . En_ dese besettenesse was ghedaen na dusage van den lande . alse bi maninghen tseeren die hier af sculdech was te maenne . En_ bi wijjsdome van ons schepenen vorseit die hier af sculdech waren te wisene . Met deser vorwarden daer to ghedaen . ware dat sake dat dese vorghenoemde cheins niet en worde v_gouden den vorgheseiden gillise te desen vorgheseiden daghe ghelijc dat vorseit es . Soe mach hi gillijs vorseit Sine hant Slaen ane dien vorseiden pant en_ dien houden en_ vromen en_ ontvromen tote ane der stont en_ der wilen dat hem alle Sine ghebreke altoes rurende van dese_ vorseiden cheinse ghienlechleech en_ al Sy v_gouden jn allen dire maniren dat vorseit es . Jn or_scape desen lettren gheseghelt met onsen ghemiene_ zeghele vte~hanghende . Dit was ghedaen jnt jaer ons hieren doe men scrief . dusentech . + drie hondert en_ neghene en_ twintech dies deysendaghes na Sente baus dach . - - - -