Corpus Van Reenen-Mulder (CRM14): Oorkonde O162p35101

Wi scepene_ van der poert van assche saluit met kinnessen der waerheit wi maken Cont en_ kinlech alle_ de_ ghene_ die dese lett_e selen zien ochte hoeren lesen . / Dat magriete heinrechs wiif van ansher es come_ voere ons bi concente van heinrecke haren wetteghen momboer . / En_ heeft v_creghen wettelech en_ wale ieghen kaetline_ ians molres wiif van assche en_ ieghen ia_ne den molre haren wetteghen momboer . veertich . scellinghe tsiaers erfelech en_ euwelech die altoes te gheuene en_ te gheldene alle iare der voerseider magriete_ telken kersauonde die altoes eenpaerlech naest come_ sal deen iaer na den anderen altoes / En_ betalen altoes met alselken paymente alse telken kersauonde sal gaen i_ borse tassche ghemeinlech . / En_ es te wetene dat de voerseide kaetline en_ ian ha_e wetteghe momboer siin come_ voere ons en_ hebben bewiist en_ v_pant en_ op den pant beseth der voerseider magrieten dese voerghenoemde veertech scellinghe tsiaers erfelech en_ bi consente van heinrecke haren wetteghen mo_boer . / En_ na sede en_ na costume bi maninghen tseren diere sculdech op was te maenne . / En_ bi wiisdoeme der scepene_ diere sculdech op waren te wisene . / Dat es te wetene op een gheleghe dat gheleghen es tassche i_ de weuerstrate met al here toebehoringhen daer de voerseide kaetline en_ ian ha_e wetteghe mo_boer nv i_ woene_ En_ dat wilen was ians meyers kaetline_ vader voerseit . / En_ i_ deser manieren daer toe ghedaen en_ metten vo_nesse ware dat sake . Dat dese voerseide . veertech scellinghe tsiaers erfelech en_ euwelech alle iare niet en worden v_gouden der voerseider mag_ten te desen voerseiden daghe en_ altoes gheliich dat voere bescreue_ es Soe mach dan de voerseide mag_te come_ en_ Slaen ha_e hant ane desen voerseide_ pant die ha_e hier voere wettelech beseth es metten rechte . / En_ dien houden vrome_ en_ ontvrome_ tote ane dier tiit en_ de wile dat ha_e dit voerseide ghelt altemale v_gouden si altoes gheliich datvoere bescreue_ es en_ alle die acht_stellicheit die ha_e daer aue comen ochte rueren . / En_ dit es ghedaen behoudelech allen rechte . jn oerconscape der waerheit dese lett_e gheseghelt met onsen ghemeine_ zeghele wthanghende . / Dit was ghedaen jn iaer ons h_en doe me_ screef Dusentich drie + hondert en_ viiftech op de_ acht_ste_ donderdach van Meerte