Corpus Van Reenen-Mulder (CRM14): Oorkonde O617r34801

Wij Lantscepenen van sotteghem . Maken cont Ende kenlijc allen den ghenen die nv sijn Ende hier naer wesen selen dat laureins van lantackere Es comen voer ons ende heeft ghecocht wel ende wettelike jeghen katelinen sputters twintich scellinghe par_ tsiaers herflike durende te gheldene jaerlijcs binnen der stede van ghent telken kersauonde ende onbegrepen van gheldinghen tote Sente marien lichtmesse daer naest volghende jn also sulken ghelde ende payemente alse de heere_ van sotteghem voers_ jaerlijcs sullen doen ontfaen van haren renten . Ende dese voernoemde twintich scellinghe parisise heeft kateline sputters voers_ bewijst ende beset wel ende wettelike den voernoemden laurense ende sinen nacomers herfelike durende . vp een dachwant lants ende sesse roeden gheleghen vp meyers coutre . douerste van der coutren neuen pieters ver mimmen / En_ vp een dachwant lants ligghende vp den alsbrouc Neuen martine ghisels weeden . Ende vp . een alf dachwant en_ sesse roeden vp den acker ligghende Naest den ghehuchte / Ende ware dat zake dat kateline voers_ ofte de ghene die de voernoemde herfachtichede houden selen niet en golden jaerlijcs de voerseide twintich scellinghe par_ herflike durende laureinse voernoemt ofte sinen nacomers ten voerseiden daghe jn alder manieren dat voerscreuen es so mochte laureins voernoemt ofte sine nacomers slaen hare hant an den voernoemden pant ghelijc an hare proper herue ende wie desen tsaertre bringhen sal mach hinre sijn van der voernoemder renten / Voert waert also dat kateline voers_ . ofte de ghene die de voernoemde herfachtichede houden selen lieten ouer~liden tsente marien licht~messe ende de voerseide rente jaerlijcs niet vergolden en ware so mochte laureins voers_ ofte sine nacomers . verteren elkes daghes twalef penninghe parisise vp den voernoemden pant sonder mindren den principael tote dies mael~s dat de voernoemde rente vulgolden ware . jn kenlijcheiden der waerheiden hebben wij lantscepenen voers_ dese lettren ghezeghelt Met onsen zeghele huuthanghende ende behouden Elcs mans rechte Dit was ghedaen jnt jaer ons heeren doe men screef dertien + hondert ende achte ende veertich vp sente maercs dach jn aprille