Corpus Van Reenen-Mulder (CRM14): Oorkonde O65230101

Wi scepenen va_ pamele en_ va_ ledeberghe maken cont allen deghene_ di dese lettren selen sien ochte hoeren lesen dat jonfrowe Clementie beghine va_ lidekerke en_ jonfrowe agnese beghine har sust_ di tote finene nu woenen hebben ghecocht wel en_ wettelike ieghen henricke vissen va_ pamele / xx scelinghe jarlics en_ erflike ombe xij . pont goets paiements va_ den lande dat soe hem wel en_ ghelike v_gouden hebben . ende dese uorseide xx s_ eflike heft deseuorseide henric visse denuorseiden susters Clem_tien en_ agnesen wel beset op een dachwant lants en_ een half dat leit ten cruce~weghe in de p_chie va_ pamele / en_ oec op een dachwa_t lants en_ een half xxx roeden men ochte dar ombetrent dat leit benneden den herrente ? Jnt dit lant vorghenomt soe sijn deseuorseide susters Clem_tie en_ agnese gheerft wettelike bi maninghe va_ den balliu en_ bi wijsdome va_ scepene_ va_ pamele en_ va_ ledeb_ghe . ende heft hem deseuorseide henric visse onderft va_ denuorseiden lande en_ heues gheworpen als teruorseider sust_ behoef / En_ oec heft hi hir toe ghedaen al dat men sculdech was te doene bi wet en_ vonnesse en_ costume va_ den lande ende va_ der stede / ende oec ghelouede hi en_ es sculdech den uorseiden susters tegheuene en_ tegeldene den erfliken cheins di vte dese lande gheet / en_ soe selen voert ghelden va_ harre hant den here dar men dat lant af houdt . voert soe heeft diuorseide henric visse dituorseide lant ontfaen va_ denuorseiden susters teen erfliken pachte ombe dese uorseide / xx s_ jarlics en_ erflike al~selcs paiement als ghinghe en_ gaue sal sijn int lant va_ gasebeke ten daghe dat men dit gelt gelden sal . en_ tegeldene telken sente baues daghe / en_ talreheileghen messe naest comende v_gouden te sine . En_ bi vorwarden / war dat sake dat dese vorseide / xx s_ jarlics niet v_gouden en waren tuschen elken sente baues daghe en_ alreheileghen messe naest come_de en_ deen pacht den andren v_uolghede / soe mochten dese uorseide susters clem_tie en_ agnese ochte har oer har hande slaen an dit uorseide lant als an haren wetteghe gherfnesse en_ dar mede doen haren vrien wille / en_ hir toe en hadde dese vorseide henric visse niet meer toe tesegghene hir ouer was als balliu deskins va_ pamele / daniel ? . voert doude bernart va_ pamele en_ jacob derechtre als scepene_ va_ pamele en_ va_ ledeberghe / en_ dit hebben si den andren scepene_ va_ pamele cont ghemaect . En_ hir ouer waren oec als wettech orkonde geropen be?der coele de pape va_ pamele / jan va_ den stenen / gilis de clerc va_ lombeke en_ Renart va_ wolfsdale . dit was gedaen jn den jare ons h_en / M . CCC / en_ ene in de maent van Meye