Corpus Van Reenen-Mulder (CRM14): Oorkonde O652r33201

het si cont en_ claer allen den ghenen die sijn en_ selen sijn . dat heinrech van der borch es co_men vor scepenen van Nieneu_ . en_ bracht_ vore eene cyrographie die ghemaect was vortijs vor de wet van nieneu_ . en_ op~ghegheuen dar af dat de tenure van worde te worde hier na volgt (onleesbaar) (onleesbaar) (onleesbaar) Waer bi dat heinr_ vors_ ouer hem seluen . ou_ sijn oer en_ ou_ jonfr_ steffen? sijns wijfs was en_ ou_ haren nacomelinghe quite heft ghescolden alle dat recht dat sij hadden ofte ghehadt mochten hebben jn so wat maniere_ dat was . ofte gheweest mochte sijn . ane al dat goet dat jan van der borch . en_ jonfr_ og_ne sijn wijf hier vors_ hadden . ofte ghehadt mochten hebben jn p_chien van asplaer . en_ van sente Entelijns scloesters bouf van nieneu_ . en_ dar af dat die van de_ vors_ cloestre langhen tiden hebben gheweest jn possessien . En_ oec ane alle dat recht dat si hadden ofte ghehadt mochten hebben . ane alle de haue en_ cateile . en_ de vromen die sijn ofte gheweest sijn . ofte sijn teneghen tiden . en_ af~ghedreghen van scloesters weghen . Ware_t huse . hout . ofte so wat vrome_ dat ware ofte gheweest sijn . en_ was wel heinr_ wille vors_ en_ es . dat alle de vorwarden . die staen jn de cyrographie die heinr_ vor scepene_ brachte . en_ dar af de tenure die hier + _voren ghescreuen staet . alse wel stade doen jn alle sticken den vors_ cloestre alse van den goede dat leit jn dese vors_ tue p_chien . alsi doen souden ofte mochten heinrike selue ofte sine_ oer ofte sijns wijfs hore vors_ ofte haren nacomelinghen . en_ heft heinr_ oec gheloeft dat hi en_ sijn oer hier af quitesceldinghe selen doen vore de wet van asplaer en_ van sente Entelijns . so welken tiden dats hem dabt van nieneu_ soffisantelec versoct ofte de ghene die dese cyrographie brinct . en_ doen doen jonfr_ ghertruden vors_ so dat de cloest_ van nieneu_ paiselec sal moghen ghebruke_ van desen vors_ goede . te euweleken daghen meer . en_ bliuen onghemoit van alle desen vorghenoemden p_sonen . En_ Alle dese vors_ pointe . en_ elc bi he_ so heft heinr_ vors_ gheloeft te houdene wel en_ wettelec op hom . en_ op al tsine sond_ ne_meer jeghen te doene jn worden ofte jn ghewerken en_ hier af . so hefti vervaen sijn oer en_ sijns wijfs oer vors_ jonfr_ ghertruden vorghenoemt . en_ haer oer . En_ daer alle dese sticken waren ghedaen . en_ gheloeft so ware alse scepene_ van nieneu_ wout_ de bartmak_e . en_ cornillijs die me_ heet flouvijn / dit was ghedaen jnt jaer ons he_en doe me_ screef M . ccc . en_ xxxij . den acht_sten dach van aprille