Corpus Van Reenen-Mulder (CRM14): Oorkonde O652r33401

Wij heinrich bi den ghedoeghe van onsen he_e . Abt van gheroutsberghe . doen te wetene allen den ghenen die dese lettren selen sien en_ hore_ lesen . dat wel onse wille es . en_ onse consent dat woutre . heinrics sone van den boechoute van asplaer . hem ghehelpe met eenen deele hofsteden . dat men van ons hout . gheleghen ten apoutre , jn de p_chie van asplaer . ter pitancien bouf van der abdien van nieneue . ofte datter hem de ghene mede ghehelpe . die men vint die op den tijt van nu . eruachtich es jn die vors_ hofstede . behouden altoes al onsen rechte . en_ eenen sterfeliken laet diere ons dabdie va_ nineu_ vors_ af setten moet . en_ van desen pointe so maken wij machtech en_ hebben ghemaect janne van middelhouen o_me daer toe doene . en_ te consenteerne al dat wij doen . ofte consentee_n mochten jn dit selue stic ghelijc dat wij selue p_sent waren . en_ so wat dat ghedaen . ofte gheconsenteert sal sijn . bi janne vors_ dat gheloue wij . en_ hebben gheloeft te houdene . goet . vaste . en_ ghestade . ghelijc dat wijt selue ghedaen hadden . behouden altoes jn allen dinghen onser eruachticheden . en_ der eruachticheden van onser abdien . Jn ki_nessen der wareit so hebbe wij hein_ . abt vors_ dese lett_en ghegheuen . beseghelt met onsen p_pren seghele . derwelke waren ghegheue_ den seuentienden dach va_ . Meye , jnt jaer . M . ccc . en_ viere en_ dertech . . .