Corpus Van Reenen-Mulder (CRM14): Oorkonde O652r33402

Wij scepenen van liedekerke en_ van leewe maken Cont en_ kenlec allen den ghene_ die dese jeghenwordeghe lett_en sullen sien of horen lesen dat allen den ghene_ die hem rechts vermaten of vermete_ mochten ane drie pont parisise dewelke erfelec en_ jaerliics ghaen vten ghelaghe dat vranken den coghe toehoerende es en_ sine_ kind_en gheleghen in de p_chie van leewe voerseit En_ daer hi op de_ tiit van nu in woenne_de es wel en_ wettelec dach gheset was te liedekerke voer de wet en_ daer af eene ghenachte bi wette ghehouden de and_e en_ de derde en_ de vierde van noetsaken en_ al bi wette . en_ daer na veruaen ten hoefde / En_ voert alle verwiist wel en_ wettelec veruolcht vteghen_men de_ conuente van Nieneue met den~welken tvonnesse dat wi te_ hoefde haelden en_ ou_ vonnesse vte~ghauen ghinc en_ liep wiisende den vors_ Conue_te de vors_ drie pont par_ erfelec en_ jaerliics op tvorseide ghelaghe te heffene en_ mids dien gheliic dat voerscreue_ es dat alle deghene dien dach te liedekerke gheset was gheliic dat voerscreuen es wettelec ueruolcht waren vteghen_men de_ vors_ Conue_te den~welken joffrouwe Cleme_tie van liedekerke de vors_ drie pont par_ erfeleke en_ jaerliics op tvors_ ghelaghe te heffene gaf in aelmoesene_ te haren pitantie_ Jn kinnessen der waerheden so hebben wi scepene_ voerseit dese jeghenwordeghe lett_en beseghelt met onsen seghele vithanghende / dit was ghegheue_ jnt jaer ons h_en doeme_ screef Dusentech . CCC . dertech en_ viere