Corpus Van Reenen-Mulder (CRM14): Oorkonde O652r33602

Wij scepenen van liedekerke En_ van leuwe maken Cont en_ kinlec Allen den ghenen die dese lettren selen zien en_ hoeren lesen dat broeder Gillijs van Exaerde p_uest van den Cloester van Nieneue heeft ontfaen bi maninghen van den here en_ met wijsdoeme van scepenen bi consente en_ wille van den here / dertien dachwant Mersch lettel men ochte meer gheleghen in lessenborch neuen des vorseits Cloesters mersch de~welke dertien dachwant mersch waeren arnouts Erue van ympeghem en_ ieghen hem wettelike ghecreghen en_ ghecocht En_ daer jn soe es broeder Gillijs wettelike gheeruet tes voers_ Cloesters boef na sede en_ Costume van den heerscape van liedeker_ En_ daer of soe heefti ghedaen den here en_ scepenen vorseit al dat hi sculdech was te doene En_ de vijftien pe_ninghe siaers diere vite ghinghen den here die heeft arnout voers_ op ander ghoet besedt bi wille van den here En_ d? Cloester voers_ moet ghelden der fermerien van Nieneue alle jaere Tuintech scellinghe parisise siaers drie hallinghe men de~welke arnout voerseit ghout der fermerien vite den voers_ merssche jn kennessen der waerheit soe hebbe wij scepenen voerghenoemt dese ieghenwoerdeghe lettren bezeghelt met onsen ghemeenen seghele van onsen scependoeme vithanghende Ghegheuen in diaer ons h_en Dusentech drie + hondert dertech en_ viue op onser vrouwen dach die leit in Merte