Corpus Van Reenen-Mulder (CRM14): Oorkonde O652r34701

het sij Cont ende kenlijc allen den ghenen die dese Cyrographie sullen sien ofte hoeren lesen / dat her Gillijs de Crudenare heeft ghecocht ende vercreghen wel en_ wetteleec ende wel betaelt ende al verghouden jeghen wouteren van den Boechoute een Buenre Meerschs ende Sesse Roeden ende eene halue lettel men ofte lettel meer gheleghen in den Caecbroec jeghen de strate die ghaet ane den pippijns borre / den welken vorseiden Meersch dat men hout van vranxs oere van doshole / ende van desen vorseiden Meersche soe heeft hem de vors_ woutere wetteleec ontherft / en_ de vors_ her Gillijs esser wetteleec toe commen bi maninghen van den Meyer ende bi wijsdoeme van scepenen en_ heeftter al af ghedaen dat hi sculdech was te doene den heere en_ der wet alse van sinen properen erue ende es te wetene dat joncfrouwe Margriete tsvorseits wouters Moeder van den boechoute moet behouden alsoe langhe alse soe leue_ sal in bileeninghen de helecht van desen vors_ Meersche lettel men ofte lettel meer gheleghen op de side te Outre weert / ende alsoe saen alse de vors_ joncfrouwe Margriete es gheghaen van liue ter doet soe sal de vors_ her Gillijs ofte de bringhere van deser Cyrographien sine hant slaen ane al den vors_ Meersch daer hi wetteleec toe commen es alse sijn proper goet ende erue Voert soe es te wetene dat Jan Roinoits ende Claus de hasseleere hebben ghenomen desen vors_ Meersch te eenen Erfeliken tseinse jeghen den vors_ her Gillise omme drie pont tien scellinghe en_ eenen penning parisise tsiaers / En_ die te gheldene en_ te betaelne den vors_ her Gillise ofte den bringhere van deser Cyrographien elcs jaers te Sencte Martens Messe in den winter ende emmer te kerssauonde daer naest volghende volghouden te sine / En_ es oec te wetene dat de vors_ jan en_ claus selen ghelden en_ betalen den vors_ her Gillise ofte den bringhere van deser Cyrographien vors_ Sess + ende + rtech scellinghe Acht penninghe en_ eenen hallinc parisise tsiaers alsoe langhe alse de vors_ joncfrouwe Margriete leuen sal / ende soe welken tijt dat de vors_ joncfrouwe Margriete es gheghaen van liue ter doet soe sal de vors_ jan en_ claus vorseit ofte haren naco_mers ghelden ende betalen den vors_ her Gillise ofte den bringhere van deser Cyrographien vors_ al gheheel elcs jaers de vors_ drie pont tiene scellinghe en_ eenen penning parisise ten daghe die vorseit es / Voert es te wetene dat de vors_ jan Roinoits heeft beset en_ bewijst den vors_ her Gillise ochte den bringhere van deser Cyrographien vors_ in Conterpande een half dachwant lants gheleghen int veldeken tusschen hasselt ende den boemghaerde ane pape jans lochten dwelke vors_ lant dat men hout van her Cornillise Rodestocke / ende de vors_ Claus de hasseleere heeft oec beset en_ bewijst den vorseiden her Gillise ofte den bringhere van deser Cyrographien vors_ in Conterpande een half dachwant lants gheleghen int vors_ veldeken tusschen hasselt ende den boemghaerde dwelke lant dat men hout van janne van Asplaer / En_ van desen vors_ lande soe hebben hem de vors_ jan en_ Claus wetteleec onterft bi maninghen van den Meyer ende bi wijsdoeme van Scepenen en_ esser al toe ghedaen datter sculdech was toe te ghesciene na sede ende costume van den dorpe ende in al sulker manieren ware dat sake dat de vorseide jan en_ Claus niet en betaelden den vors_ her Gillise ofte den bringhere van deser Cyrographien dese vors_ Rente elcs jaers te sencte Martens Messe ghelijc dat vorseit es en_ kerssauont daer naest volghende ouer~lede dat hi dan niet en betaelt ende volghouden en ware / Soe mach de vors_ her Gillijs ofte den bringhere van deser Cyrographien vors_ hant slaen ane den vors_ Meersch en_ ane de vors_ Conterpande alse ane sijn proper goet ende Erue sonder daer~ieghen iemene iet te segghene en_ sonder iemene iet daer af weder te keerne / ende ommedat alle dese dinghen en_ poente voerscreuen sijn ghedaen wel en_ wetteleec na sede en_ vsage en_ costume van den dorpe / ende o_me~dat si sullen bliuen goet / vast / ghestade / en_ wel ghehouden / sonder fute / fraude ofte malentgien en_ sonder arghelust / Soe was hier ouer alse Meyer van Asplaer / jan de Meyer / ende alse scepenen van den seluen dorpe woutere va_ der haghen heinric pot / Gillijs der kinder heinric lobbe / Cornillijs van ghapenberghe en_ Mahieu Adriaens / dit was ghedaen jnt jaer ons heeren doe men screef Dusentech Drie + hondert en_ Sess + en + viertech den Tualefsten dach va_ lochmaende