Corpus Van Reenen-Mulder (CRM14): Oorkonde O652r34901

Weeten alle de ghene die Siin en_ die te co_mene Siin dat broeder Jhan de waghenmakere pitanchier van den Cloestre en_ den conuente va_ Nieneve heeft ghecocht ter pitantien boef va_ den conuente vorseit wel en_ wettelike ieghen jonfrouwen magrieten va_ wolfsdale en_ ieghe_ jonfrouwe_ alisen jhans wiif was va_ wolfsdale en_ ieghe_ jhanne haren sone . viere . en_ viertech . roeden erfachtecheden gheleghen te wolfsdale neue_ den viuer op de side te leebeke weert . Jtem tsauoer en_ den endeldam . viue . en_ dertech . roeden groet gheleghen tote an willems mersch va_ den putte / En_ in de hofstede va_ wolfsdale . + vors_ viertiene roeden / en_ ene halue groet ten viuer wert strikende tote in den viuer / de~welke vors_ erfachtechede men hout va_ jhanne Reneute . de~welke jhan hier toe Siin consent ghedaen heeft en_ ouer~ghegheuen der vors_ pitantien sco_uens boef wettelike al Siin recht dat hire ane hadde en_ vte~gheghaen / En_ esser broeder jhan de waghenmakere wettelike toe co_men ter pitantien boef vors_ . Uoert ant dorneke gheleghen . eene . en_ twintech roeden streckende tote int hof / en_ vore thof sestiene roeden en_ ene halue groet / de~welke dat men hout van wille_me van den putte / En_ van allen desen vors_ stucken es den vors_ partien ghenoech ghedaen en_ al vergouden wettelike gheliic dat coste . Uoert soe eest te wetene dat die ghene die op de hofstede van wolfsdale woenen of daer ten houe toe horen dat si moghen varen en_ keren te haren goede bouen en_ beneden ter minster scaden van der pitantien vors_ sonder enech malengien . Uoert soe eest te wetene dat jonfrouwe alise en_ jhan haren sone vors_ hebben beset en_ bewiist te eene_ Conterpande haren hofstede en_ een stuc lants daer neuen gheleghen / omtrent onder + half dachwant groet lettel men ofte meer de~welke men hout van wille_me van den putte den meyer in handen op~ghedreghen te pitanchiers boef / + vors_ ware dat sake dat iemen van haren weghen ofte van haerre kindre weghen onghebruuc daden der pitantien vors_ van der vors_ erfachtecheden die broeder jhan vors_ ghecocht heeft ter vors_ pitantien boef ieghen de vors_ p_sone so mochte de pitantie vorghenoemt ghereken haren ghebreken an de vors_ hofstede en_ lant / behouden altoes willems rechte van den putte / + vors_ alse van seuen roeden in de hofstede die hem te enen Conterpande gheset Siin . Uoert soe heeft magriete van der jode of sueckers haren wech vore thof te enen stucke lants omtrent . iiij s . dachwant groet te haren p_fite sond_ malengien . En_ altoes ter minster scaden van der vors_ pitantien / dwelke stuc lants dat leit in deene side neuen sgodshuus lant van Nieneve / en_ an dander side neuen willems lant van den putte . Uoert o_me~dat dese vorseide vorwaerden selen bliuen goet / vast en_ ghestade soe wasser ouer alse meyer van asplaer jhan de meyer En_ alse scepen_ van asplaer wout_ van der haghen / heinric pot / Cornelus van gapenberghe / heinric lobbe jhan Reneut / pape jhan / Maihu van beuere . dit was ghedaen jnt iaer ons heren alse men screef . &mring; . ccc˚ . en_ . xli&xring; . den drie en_ twintichste dach va_ maerte