Corpus Van Reenen-Mulder (CRM14): Oorkonde O652r35401

Wij jan vanden zuersele jn tiden vorleden doe dese saken hier na volghende ghedaen waren Ghecommittert ende ghestelt was machtech jn den name ende stede houdende eens Edels ende weerds mans miins her willems van Beghersulaere te dien tiden souuerain Bailliu van den lande ende Graefscepe van aelst / ende alse manne ons liefs ende gheduchts h_en Sgrauen van vlaendren Adaem van lede . Bouden van zierenbeke . Gillis vten houe . hughe de prouest . jan vander Elst ende Obbiert vander visscherien . doen te wetene allen den ghenen die dese lett_en selen zien ofte horen lesen dat op verledenen tijt een groet geschil ende debat was tusschen Edel liede ende wyse . Mynher . janne van Muelnhem Bidd_e an deen side . En_ Bussarde van Campine an dand_ side Alse van v_dolder renten van Euenen ende van Capoenen dwelke . . Bussard vorghen_ segghende was dat sculdech waer te gane vten goede dat men heedt ten voerde gheleghen binnen der prochien van okeghem ende daer omtrent den vorseiden goede toe~behoerende . ende in dien tiden toe~hoerde min her janne vorseit . dwelke vorgheseide goet de Cloester ende . . Tgodshuus van Nieneue sint ghecreghen hebben jeghen miin her . . janne vorghenoemt ende wettelec der toe comen siin / ende der jnne gheerft siin op dwelke vorseide gheschil ende debat vten v_souke van miin her janne ende van Bussaerde vorseit wij ghecommittert ende ghesonden waren Tokeghem omme hier op eene chercminage ende besouc te doene op dwelke wij na heesch ende antwerdde van beeden vors_ partyen op de saken claerlecke hoerden de goede liede diere af wisten ofte weten mochten te sprekene ouderinghen / bistanders / ende ommesaten / alsoe verre alse partyen begherden jn dwelke besouc wij niet en vonden dat . . Bussard vorghen_ noch sine vorders eenich recht groet ofte cleene noeyt en hadden no bi rechte hebben en mochten jn eruen noch in renten toe~hoerende den vorseiden goede ten voerde . noch datt_ gheene saken vte enghinghen daer bussard vorghen_ recht an heesschen mochte want_ negheen goet vonden en was daer Rente vte gaen mochte bussarde ofte yemen el . ende mids deser jnformatie so wijsde wij den vorseiden miin her . . janne ende tforseide goet ten voerde van Bussards heessche ledech ende quite / ende dese dinghen waren wettelec ghedaen ende besocht ghelijc datd vorseit es opten vijf + en + twintechsten dach der maent van spelmaende dat was jnd jaer ons he_en doe men screef dusentech drie + hondert ende viftech . ende jc . . Bussard van Campine bouenghenoemt mids den vorgheseiden besouke ende wettelecken vonnesse dat de vorghen_ manne wiere huusghenoet dat ic ben jn dese vorseide saken ghedaen en_ ghewijst hebben / ende miin heesch der jnne mi ontwijst so hebbic quite ghescouden ende schelde quite teewellecken daghen ouer mi seluen ende ouer miin nacom_s nemm_meer eenich recht te heeschen noch te doen heeschene an eeneghe Renten ofte goede vtegaende vten vorseiden goede ten voerde dat miins her jans was van muelnhem vorghenoemt ende nv toe~behoerende es den . . Cloest_e ende den Godshuse van Nieneue vorgheseit / ende al dit so hebbic bussard vorseit ghelouet ende gheloue te houdene bi mier trouwen ende bi waerheden . jn orconscepe ende vastenessen van al desen vorseiden dinghen so hebben wij jan van den zuersele vorseit souuerain Bailliu van den lande ende graefscepe van aelst opten tijt van nv / ende adaem van lede . Bouden van zierenbeke / Gillis vten houe hughe de prouest jan vander Elst ende obbiert van der visscherien manne ons liefs ende gheduchts h_en vorghenoemt ende ic . . Bussard vorseit metgaders den vorseiden mannen wiere huusghenoet dat ic ben / kenne met hem~lieden alle dese vorseide dinghen op mi selue_ ende hebben doen metgaders den and_en elc van ons~lieden dese lett_en gheseghelt met onsen propren zeglen vtehanghende ghedaen jnd jaer ons h_en alse men scrijft dusentech drie hond_t viere ende viftech den derden dach van meye ten jngane