Corpus Van Reenen-Mulder (CRM14): Oorkonde O652r36001

Wij scepenen van pamele maken cont en_ kenlec allen den ghenen die dese jeghewordeghe Cyrographie selen sien ofte hoeren lesen dat comen es vore ons steuen van seuenberghen en_ heeft ghecocht en_ vercreghen wettelec en_ redelec en_ wel vergouden ieghen magrieten godeveerts tsaghers dochter een half dachwant meerschs lettel men ofte meer in allen ghelaghen dat gheleghen es in den piesel neeuen baten meersch van opphem van den~welken half dachwant meerschs de vorseide magriete hore heeft wettelec onterft en_ de vorseide steuen essere neuelec toe comen en_ heeft de vorseide magriete de_ vorseiden steuene gheloeft op haren en_ op al dat si heeft commerloes te houdene en_ te warendeerne den vorseiden meersch van alre anderscout sonder van der heeren scout dat es te wetene twee oude_ miten vten vorseiden half dachwant meerschs / en_ dit was ghedaen bi mani_ghen van den heere diere sculdich was op te manene en_ bi wijsdoeme van scepenen diere sculdich waren op te wisene negheenen pointen van rechte achter ghelaten / ende omme~dat dit sal bliuen goet vaste en_ ghestade en_ wel ghehouden soe hebben wij scepenen vorseit dese Cyrographie ontfaen in ke_nessen van vaerheiden en_ bi versoeke en_ bede van den paertien dit was ghedaen int jaer ons heeren doe men screef dusentech drie + hondert ende tsestech den tienden dach van meye .