Corpus Van Reenen-Mulder (CRM14): Oorkonde O652r36201

het sij cont allen den ghenen die dese Jeghenwardeghe Cyrographie Selen zien ofte hoeren lesen dat miin he_e de Abdt va_ Nieneue heeft ghecocht en_ vercreghen redelec en_ wel betaelt te siins godshuis bouf Jeghen Janne ysenbaerde ende Jeghen katelinen siin wetteghe wijf een dachwand landts lettel men of meer gheleghen int heerscap va_ hoelbeke in eene stede die men heet ter slaect tusschen Scloesters land van nieneue en_ des vorseids Jans ysenbaerds meerssche commende met den ende tote an de strate met eene_ penninghe parisisen vri ten houe van hoelbeke / ende van desen vors_ dachwande lands Soe hebben Jan ysenbaerts en_ kateline siin wetteghe wijf met voochde hem wettelec onterft bi maninghe_ van den balliu en_ bi wijsdoeme van Scepenen ende in dier seluer manieren Soe essere miin he_e de Abdt te siins godshuis bouf wettelec toe comen ende in gheerft / ende om~dat miin he_e de Abdt en_ siin godshuis vors_ des vors_ landts eewelec paysiueleke ghebruken selen Soe es hier toe al ghesciet dat menre sculdech was toe te doene na sede ende coustume van der wet van hoelbeke negheene Sake va_ rechte achter ghelaten / ende waren hier ouer Jan de smet van Essche alse balliu / En_ alse Scepenen Jan heysse Cornillijs van der lenden en_ gillijs va_ den berghe / dit was ghedaen Jnt jaer ons he_en doemen screef duisentech / drie + hondert een ende Sestech de . xxviijten dach van Sporkele /