Corpus Van Reenen-Mulder (CRM14): Oorkonde O652r36401

JC . . Jan van . . Aa . Rudder / doe Cont allen lieden / dat een onderscheedich / ende Religieus prelaet . her . . Cornelijs / bi den ghedoeghe ons heeren . . Abdt van Niniue / van der ordine_ van pREmonstreit / van den bisscopdoeme van Camerike / Jeghen Mi heeft ghecocht / wettelec vercreghen / ghequijt en_ wel betaelt / te sijns goodshuis behoef viere pond paris_ tsiaers / Erfeliker Renten / de~welke / die mine vordren hadden ende die jc ghehadt hebbe op haerlieder Mersch / jn de prochie van yedeghem / Ghelijc dat Eene wetteghe Cyrographe verclaert / die de voors_ . . Abt daer af heeft / ligghende onder de wet van Scendelbeke / van den welken Coepe / Jc mj kenne wel en_ wetteleke betaelt / en_ schelde daer af quite / ouer Mi seluen / ouer mijn oer / ouer mine nacomers en_ ouer alle mine medeghedeele minen he_e den . . Abdt voors_ / Sijn goodshuis / en_ haerlieder bewijs / en_ alle de ghene diere quitanche af behoeuen / En_ waert alsoe / dat vander voors_ Renten waren Eeneghe forchen van tsiaertren / ofte van Eeneghen andren brieuen / onder wien / te soe wat Steden / ofte onder Soe wat persoene dat Sij waren / ofte wesen mochten / op dit voors_ goet / ofte op Eenich ander / den voors_ goodshuise toebehoerende / tote den daghe der daten van deser l_ren / die Renunciere jc / en_ kense doet / en_ te nieute / ende hebbe gheloeft / en_ gheloue Jn goeder trouwen op mine Eere en_ op mine gheloefsaemheit / dat jc daer mede ne_mermeer en sal pinen te ghehelpene / noch bi mi seluen / noch bi andren p_soenen ende hebbe gheloeft en_ gheloue Mine_ he_e / den . . Abt / en_ sinen goodshuise voors_ / van den voors_ viere pond paris_ / teeweliken daghen goet warant te sine / en_ te houdene in paisiuelre possessien / ouer mj seluen / ouer mijn Oer / ende ouer mine nacomers / ende ouer alle mine medeghedeele / op mj seluen / en_ op al mijn goet / waert gheleghen es / ende waert alsoe dat hiemen den voors_ goodshuise Eeneghe afstellichede dade teeneghen daghen ende hemlieden daer af / Eeneghe coste ofte scaden quamen / die hebbe jc hem gheloeft en_ gheloue jn al der Manieren voors_ / op mj en_ op dmine te gheldene en_ op te rechtene / thaers selfs Redenliken segghene / sonder andere proeue daer toe te doene / ende waert alsoe / dat den voors_ goodshuise van der voors_ Rente_ Eeneghe afstellichede ghedaen worde / en_ sij daer bi vielen in Coste ofte jn Scaden / Soe bidde jc allen hoeren / gheestelijc ofte weerlijc / daer men mj / ofte dmine onder vinden sal / mijn Oer / en_ mine nacomers / dat sij ons en_ donse daer toe confermgeren / dat mine he_e de . . Abt en_ Tgoodshuis voors_ van den voors_ vier ponden paris_ moghen bliue_ ghehouden in paisiuelre possessien / sonder cost en_ sonder scade teeweliken daghen / ende o_me de Redene / dat Jc . . Jan van . . Aa . voors_ wille en_ begheere / dat alle dese voors_ pointe / en_ Elc sonderlinghe ghehouden bliuen / Soe gheloue Jc jn goeder trouwen / waert alsoe / dat jn desen brieue / Eeneghe worde stonden te vele ofte te lettel / die eenich van den vorwaerden beieghene_ mochten / die ghelouic te beterne / Soe wanneer dat Jcs van tgoodshuis weghen voors_ vermaent ofte versocht sal werden / bi der orconscepen van deser l_ren beseghelt met minen seghele huithanghende / ghemaect ende ghegheuen Jnt jaer ons heeren / doemen screef / dusentich / drie + hondert / ende vier + en + tsestich / den Een + en + twintechsten dach van decembre . .