Corpus Van Reenen-Mulder (CRM14): Oorkonde O652r37901

Wij scepenen van liedekerke en_ van leeuwe maken cont en_ kinlec allen denghenen die desen tsaerttere selen zien ofte horen lesen dat comen es vore ons jan van jnghelbouts~velde / en_ heeft verkint / verlijt / en_ ghelooft dat hi . Siin oer / en_ sine gherechte nacomers siin sculdich te bevredene te eeuweliken daghen Tskloesters mersch van Nieneue Te liedekerke gheleghen dien men heet Theydekiin / die Jeghen des voerseits jans van jnghelbouts~velde mersch gheleghe_ es / den~welken hi vercreech Jeghen janne den groten weder dat men den cloestermersch voers_ sal etten ofte niet etten / En_ de gracht / ofte waterganc / ofte waterleede hoe die ghenaemt mach siin tusschen jans mersch voers_ en_ tskloesters mersch voerghenoemt / dien nu jan claus te pachte houdt dien sal de vorseide jan van jnghelbouts~velde Rumen / ofte doen rumen eeuwelec en_ erffelec hi en_ sine gherechte nacomers / ofte deghene die jans va_ jnghelbouts~velde mersch voers_ besitte_ selen alsoe diepe / alsoe wijt / en_ alsoe menichwaerf alst behoeuen sal sonder hulpe van den cloester voers_ / ofte van yemene die daer tskloesters mersch voers_ houden sal in hueringhen ofte in and_e wijs / En_ waert alsoe dat jan va_ inghelbouts~velde voers_ / ofte sine wetteghe nacomers / ofte deghene die jans mersch voers_ besitten selen niet en heymden te tide tskloesters mersch voerghen_ en_ jan voers_ / ofte sine wetteghe nacomers / ofte deghene die jans mersch voers_ besitten selen scade hadde_ van skloesters weghen met beesten / daer af souden die van den cloest_e voers_ / en_ de besitters van haerlieder mersche voers_ onghehouden siin / En_ quame_ den cloestere voers_ / ofte de besitters van haerlieder mersche scade midts jans voers_ / ofte siinre wettigher nacomers / ofte der gheenre die sinen mersch besitten selen / qualec heymene / die scade soude jan voers_ / ofte sine wetteghe nacomers / ofte de ghene die sinen mersch besitten selen den voerseiden cloest_e / ofte den besitters van haerlieder mersche voers_ ghelden en_ oprechten ten segghene van goeden wisen lieden die zulke_ zaken vroet en_ wijs siin . En_ o_me~dat alle dese voerseide dinghen wettelec vore ons siin ghedaen en_ goet . vaste / ghestade / en_ wel ghehouden bliuen selen sonder archeit ofte eenich begrijp / en_ o_me de bede en_ versoec van bede den p_tien voerghenoemt / Soe hebben wij scepenen voers_ desen presenten tsaert_e bezeghelt met onsen ghemeenen zeghele van onsen scependoeme . vtehanghende in kinnessen der waerheit / dit was ghedaen jn jaer ons heeren doe men screef Dusentech drie + hondert en_ neghene en_ tseuentich den vierden dach in mey