Corpus Van Reenen-Mulder (CRM14): Oorkonde O708r31501

Ane alle de ghene die dese lett_e selen sien ochte horen lesen . . Jc jan blankaert rechtre mijns heren van valkenborch / saluut en_ kinnesse der waerheit . en_ doe cont mett_ waerheit / dat vor mi es coemen en_ voer late sheren van valkenborch . . heinric celien sone vanden berghe / en_ heeft v_creghen en_ ghecocht erfleke / jeghen aerde van bukelaer een halster rogs / ende twelue grote tornoise goet en_ custbere van sconinx Slaghe van vrankerike en_ dat heeft hem dese voerghenoemde aert van bukelaer bewijst en_ vercocht erflec op alselc goet alse hier na bescreuen es / dat geleghen es inde prochghie vander reet in tgoet van bukelaer / dat es te wetene opt riisbloc / en_ op terde~bloc / en_ op een half bunre lants dat gheleghen es tenden neuen de rijst ende dese voerghenoemde aert van bukelaer / ochte sine nacoemelinghe / die sal leueren dit voerghenoemde halst_ rogs en_ . xij . grote tornoyse / den voerghenoemden heinric celien sone / ochte sire gheboerten die na he_ coemen selen . dat es te wetene van jare te jare telken kersauonde . . jn de prochghie van scelle . hier toe es ghesciet al datt_ toe sculdech was te ghesciene / met maenissen sheren en_ wiisdoeme der late diere sculdech op waren te wisene . . dit siin onse late diere ouer waren . . jan cluppel . . jan de brune / en_ pieter van hoenbeke . . En_ o_me~dat dese voerghenoemde dinghen ghesciede en_ voer mi ghedaen waren / en_ voer late die hier voren bescreuen Sijn en_ ic wille dat si / vast / seker ghestade en_ wel ghehouden bliuen / so hebbic jan blankaert rechtre sheren van valkenborch voerghenoemd / dese lettre bezeghelt met minen seghele ouer mi en_ ouer de late voerghenoemd Dese lett_e was ghemaect en_ ghescreuen jnt jaer ons heren als men screef ons heren jaer . &mring; . ccc˚ . en_ viftiene / jn sente katelinen auonde . .