Corpus Van Reenen-Mulder (CRM14): Oorkonde O738r31204

Wi scepenen van leneke maken cont alle_ den ghenen die dese lettere selen sien en_ hoere_ lesen dat quam voer ons jonfrouwe Machtelt die men heet Michils dochter van Elinghen si en_ haer moemboer dien haer de Meier gaf met den Rechte Ende lijsbeth haer suster en_ haer momboer dien haer de Meier gaf als recht was en_ drogen op den Meier in de hant bi mani_ge_ en_ bi wijsdome alle dat Erue dat si houdende waren alsoe verre alst behoerde ter banc en_ ten wijsdome van leneke en_ ont~erueden hem daer aue ser heinrex boef des Capellaens van sinte goerex die wilen custere was in die selue kerke te sinte gorex te bruesele bi mani_ghen smeiers en_ bi wijsdome der scepenen En_ ouerMids . viftien + ponden siaers ewelec en_ erfelec staende en_ telken kersauonde te gheldene den ouden groten witten conincs tornoisen ouer achtien + peni_ge ochte de werde daer aue tere capelrien behoef in sinte goerex kerke te bruesele vore genoemt . En_ met alselken voerwarden waer dat sake dat men den voer~gheseiden here_ heinrecke nine goude te dien daghe die vore ghesproken is soe mochte die vore~geseide her heinric de capellaen sine hant slaen ane dat voer~gheseide erue alse ane sine_ pant ende vromen en_ ontvromen tote ane diere stont dat hi alle sijn achterstellicheit aue~ghedreghen hadde en_ alle sine_ cost die hire o_me gedaen hadde alsoe verre alse hi den scepenen bedenlec en_ mogenlec dunken soude . Voert soe is te verstane soe weltijt dat die vore~gheseiden jonffrouwen selen hebben ghecocht die voer~geseide vijftien pont jaerlikes erfelec op ene_ anderen goeden pant ter voer~geseider Capelrien behoef in die vore~gheseide kerke en_ die wel beset selen sijn op tuee Milen na bruesele en_ der voir~gheseider capelrien ghenoech ghedaen is en_ al op der jonffrouwen cost soe sal dat voer~gheseide erue sijn ontco_mert en_ los en_ quite van dien voer~geseiden co_mere dire de voer~geseide her heinrec op heuet . Voert soe is oec te verstane Soe wa_neer dat die vore~gheseide joffrouwen selen hebben vergouden tere su_men . drie hondert pont den ouden groeten conincs tornoisen ouer achtien pe_ninge ochte de werde daer aue soe dat menre rente_ mede copen mach ter vore~geseider capelrien behoef dan sal oec dat voer~geseide erue ontco_mert sijn en_ los en_ quite van dien vore~geseiden vieftien + ponden dire de vore~geseide her heinrec de capellaen op heuet . Voert soe is te verstane dat de vore~geseide Meier eruede den voer~geseiden here_ heinrecke den capellaen in dit voer~geseide erue bi mani_ge_ smeiers en_ bi wijsdome der scepene_ Met alsoe alselken voerwarden alst op was gedreghe_ na seide en_ costume van den dorpe van leneke / En_ o_me~dat dit waer was en_ dit ald_ voer ons ghesciede soe hebben wij vore~gheseide scepene_ dese l_re bezeghelt met onsen ghemeine_ segele Dese l_ren waren gegeuen jnt jaer ons heren als + men screef incarnacioen . Dusentich . . drie + hondert en_ twelue smane_daghes na sinte peters dach alse men crone_ vernouwet - - -