Corpus Van Reenen-Mulder (CRM14): Oorkonde O739r31201

Alle den ghenen die dese lett_e zelen sien ochte horen lesen wi scepenen ghemeinlec van Goyke salut en_ kinnesse der wareit . wi doen cont dat voer ons es comen . ywain van der loe van goyke en_ droech op janne sine_ soene alle die lijftochte die hi van heme hilt en_ houdende was ane vif bunre ouder wennens lands bemds en_ bochs die gheleghen sijn tote goyke omtrent den berghe aldaer en_ gheloefde de vore~ghenoemde ywain op sine trouwe en_ suoer dat hi ombe neghene noet die daer toe driuen mochte nemmermeer dese vore~ghenoemde lijftocht calengiren en soude . En_ hier + na quam de vorgenoemde jan en_ droech met gherechten vertienesse_ in de hande willems die men heet Mol alse daer toe gheset van arnouts here van craynem weghen bi mani_gen des voreghenoems willems van arnouts weghen vore~ghenoemt en_ bi onsen wijsdoeme te behoef ser amelrix van + der hille_ canonex van + der kerken van sente ghoedelen van brusele alse van + der capittelen wegen van der seluer kerken en_ te haren behoef dese vore~ghenoemde vijf bunre . En_ hier en~tenden soe gaf de vore~ghenoemt willem van arnouts weghen vore~ghenoemt den vore~ghenoemden h_en amelrike ter vore~ghenoemder capittelen behoef dese vore~ghenoemde vijf bunre erfelike en_ ewelike te houdene van den vore~ghenoemden arnoude op den tseins die daer sculdech es vte te gane . En_ alse al dit ghesciet was en_ her amelrec ter capittelen behoef in dit ghoet gheeruet was met alle der solemniteit van Rechte dat in sulken dingen sculdech es te ghesciene . soe gaf de selue her amelrec van + der capittelen weghen vore~ghenoemt dit vorgenoemde ghoet den vore~gheno_mden janne en_ ywaine sine_ vader . Dat es te v_stane janne alse gheerue en_ ywaine als lijftochtere bi mani_gen bi consente en_ bi willecore dies voreghenoems willems van arnouts weghen vorgenoemt en_ bi onsen wijsdoeme erfeleke te houdene en_ te besittene op den tseins die daer vore den vorgenoemden arnoude vte gheet en_ op enen tseins van tien ponden Munten alse ten daghe van + der gheldingen ghemeinlec in borse ghaen sal . En_ telken kersauonde te vallene En_ v_gouden te sine elkes jaers in dertiendaghe naest volgende eweleke en_ erfeleke der vorgenoemder capittelen ochte haren sekeren bode En_ met alselker vorwarden ware dat sake dat de vore~gheseide jan ochte ywain sijn vader niet ghenoech en daden der vore~genoemder Capittelen ochte haren sekeren bode van den vorgenoemden tien ponden ten vore~ghenoemden daghe . dat dan dit vore~ghenoemde ghoet gheheelleke en_ al keren soude op de vore~ghenoemde capittele . Ende alsoe dat dan de capittele dat goet payselike en_ vredelike houden soude alse hare erue sonder eneghe lettenisse . jn + de~welke orkenscap wi scepene_ van goyke vorgenoemt bi beeden van + den p_tien onsen gemeine_ seghel ane dese l_ren hebben ghehangen Dit was ghedaen jn den jaren ons h_en dat men screef Dusentech drie + hondert en_ tualeue des ghoensdaghes vor sente Marx dach - - - - -