Corpus Van Reenen-Mulder (CRM14): Oorkonde O790r33201

Cont si allen den ghenen die dese lettren selen sien en_ horen lesen dat es comen vore Ons scepenen van vrier poert van lembeke jan die + men heet van der logen jans brunen sone was van lembeke ende heeft ghekint dat hi heft vercocht wettelec ende wale her heinrecke die + men heet van businghen ochte den ghenen die dese lettre brinct viftech scellinghe tsiaers erfelec staende in allen den manieren dat + se jan van + der logen voreghenoemt houdende was / en_ gheliker wijs dat scepene~lettren van lembeke inne hebben / welke viftech scellinghe tsiaers de voreghenoemde her heinrec heft ghecocht te ere capelrien behoef in sente goedelen kerke leit van brusele uore sente jans outere welke capelrie vranke uten steenweghe stichte ende maecte Voert es te wetene dat jan van + der logen voreghenoemt es comen vore de heren daer me_ de bewisenesse en_ dassennement aue hout daer de vorseide viftech scellinghe tsiaers op bewijst en_ gheassenneert sijn gheliker wijs dat scepen~lettren van lembeke inne hebben en_ heues hem ontherft te wette en_ te vonnesse bi maninghen van + den heren daer + ment aue hout en_ bi wijsdomme haerre late en_ heuet den heren in handen ghedreghen te des vorseits her heinrecs behoef ochte des ghenen die dese lettre brinct / Ende hebben de h_en haren coep dar aue onfaen Ende omme~dat wi de heren daer + me_ de vorseide assennemente aue hout en_ de late diere wisers aue sijn enghene seghele en hebben soe bidde wi eersamme_ lieden en_ wisen den scepenen van lembeke voreghenoemt dat si dese ieghewerdeghe lettre willen beseghelen in kinnessen der waerheit Ende wi scepenen voreghenoemt ouermits de bede van + den heren en_ van haren laten voreghenoemt hebbe + wi dese ieghewerdeghe lettre beseghelt in kinnessen der waerheit met onsen propren ghemeinen seghele vuithanghende bi beden en_ bi versueke van al + den partien . Dit was ghedaen int jaer Ons h_en alse + men screef dusentech drie + hondert en_ twee en_ dertech in oeghstmaende