Corpus Van Reenen-Mulder (CRM14): Oorkonde P040p32101

Cont siit en yghewelken dat her Heinric van Robbensrode , priestere die bevaen es met ghesteleken klederen der ordenen onser vrouwen sinte Marien van Premonstreit , di + men heet wit moneke , ende Jan van Robbensrode , wettegh ghebrudere van vader ende moder , dat si deilden al sulc guet als hen blef na doet haers vader ende harre moder , overmits harre vrinde raet ende harre maghe , ende dat den ghesteleken man herren Henric gheviil ter deillinghen en bosch die gheheten es Dekoudenber , also als gheleghen es tusschen putte ende pael ende ment hout van + den commendur van Beckenvort ende van + den goets~huse , Janne sinen bruder ghevyl en eussel dat men heet de Bruel , dat men hout van en ersammen knape Vrancken van Wanghe , ende en stucke lands dat men heet Theideken , dat gheleghen es aen de Lulhove , dat men oec van Vranken hout . Hier verteghen Heinric te Janne wert ende Jan weder herren Heinricke wert , als van ghebruderleker deillinghen , ende en~ghenrehande point van rechte achter~ghelaten . Hir over waren Willem van + den Haghedorne , Jan Strote Arnouts sone , Godevert Strote , Heinric Grotman , Willem Hosch , Jan van Markenrode ende Jan van Mere , scepene des commandurs van Beckenvort , welke scepenen haers propers seghels darfden ende baden den commendur van Beckenvort als haren here , dat hii dese letteren beseghelde op hen te tughene . Ende wi brueder , Otte van Ralmen , commendur in Beckenvort , om de bede onser scepenen hiet wi onsen seghel van onser commendurscap aen desen brief hanghen in ghetugnisse der waerheit . Ende wi Arnout Peters sone , Jan Strote Arnouts sone , Jan Strote Margriten sone , Jan van Robbensrode , Art van Brokem , Jan Coppen ende Heinric van + der Scuren , scepenen Vrancs van Wanghe , saghen ende horden alle de voerghenumde deillinghe ende yghewelken ten anderen wert vertien voer den hof ende voer den here , in ghetugnisse der waerheit hiit wi onsen seghel van onser scepenscap , di wi ghemeineclike ghebruken aen desen brief hanghen . Dit ghescide int jaer ons Heren doen men scref &mring; c˚cc jaer ende twinteeg , drie daghe binnen sporkel~maent .