Corpus Van Reenen-Mulder (CRM14): Oorkonde P044p37501

Wij . Godevaert hegghen / Arnout Jans / goeswijn van bakele / heinric van den poele / ghijsbrecht op ghen heyde / mathijs va_ vinne_ en_ willem craem / Scepene van zeelem / doen Cont dat voer ons en_ voer heinric van roesmeer meyer van zeelem / ghestaen Pauwels borghers becreech in erfdo_me wittelec mitten recht totter sartrosen behoef van zeelem / jeghen gertruden aerts coenraets wittighe dochter / die twee ghedeelten als aerts coenraets en_ coenens sijns broeders was / ghedeelten / van ene_ beemde / die te~gadere houdende es drie zillen luttel min of luttel meer en_ heit coenraets eusel gheleghen te zeelem tusschen die deemere en_ die strate en_ bij beemde_ der selver Sartrosen op beiden ziden / Aldaer hij aert coenraets siin tochte af derfde / en_ hoer gertruden siinre docht_ voern_ op~droech mitten rechte Jn welken tween ghedeelten van dien beemde voergh_ / dat nae opdraghen en_ vertyen der selver gertrude_ mit hoere_ monbore daer toe ghelevert als recht was / die selve pauwels borghers totter sartrosen behoef voergh_ wart gheghoedt en_ gheerft / met manisse met vo_nisse en_ met hoefs rechte / die voergh_ twee ghedeelten erflike te hebbene in allen den selven rechte dat sij geertruyt voers_ hadde en_ houdende was / Oec so gheloefde sij gheertruyt mit hoere_ voergh_ mo_bore / den voers_ pauwelse totter sartrosen behoef voergh_ dese twee ghedeelten voers_ co_merloes te houdene op desen dach van deser l_ren van allen meerre_ voerco_mer dan op twee penninghe grontchiins den here / en_ op twee pe_ninghe chiins der kerken van zeelem daer af jaerlics te betalene Jn orkonde der waerheit hier af hebbe wij onsen ghemeine_ zeghel aen desen brief ghehanghen Ghegheve_ jnt jaer ons h_en . M˚ . + CCC˚ . + lxxv˚ . tien daghe in junio