Corpus Van Reenen-Mulder (CRM14): Oorkonde P048a39801

Wij henric van eltre servaes hannema_s pouwels luydgaerden Jan van der hulst en_ henr_ lodewijcs Scepen_ onser ghenadiger vrouwen der hertoghynne van brabant in den hove van zelke tughen en_ doen cond allen luden die dese l_re solen sien en_ hore_ lesen dat voer ons en_ voer matheeus van ruselmolen Richt_e des vors_ hoefs selver ghestaen goeswijn van yseren kende en_ lijde hoem hebben erflicken vercocht Stassen barbiers daer ieghenwordich en_ ieghen den selve_ goeswijn vercrighende een half boenre beempts luttel min ofte meer die men heet die Colker~beempt gheleghen tusschen erfnisse Costijns van ranst op deen sijde en_ henr_ van elt_e op dander sijde van den vors_ Stasse sine_ gheerve_ en_ naecomelinghen ewelijc en_ ommermeer peyslijc en_ vredelijc te besittene tsiaers op een halster evenen onser ghenadighen vrouwe_ va_ braba_t en_ met niet meer lasts . En_ henr_ van eltre heeft op dat vors_ half boenre beemps verteghen en_ quijt ghescoude_ alle dat recht dat hi hem vermetende was tot den halve_ boenre beemps vors_ . Mar want Stas vors_ hier toe comen niet en mochte nae costume des hoefs vors_ soe heeft hij die come_scap overghegheve_ wout_en van . Eetsrijc die sijn wettich dochter heeft En_ daer o_me soe heft goeswijn vors_ dien beempt vors_ opghedraghen vonneslijc verteghen en_ met halme gheresigneert in hande ons richt_s vors_ in naeme en_ tot orber wouters va_ etsrijc vors_ En_ die selve wouter waert met manisse ons Richt_s en_ onser scepen_ vonnesse daer op ghegheven gheerft en_ ghegoet in dien beempt vors_ na allen rechte heerbrenghen ofte vsagien des vors_ hoefs . Hier voert toe ghesciede alle rechte en_ solempniteyt datter toe behoerlijc was te ghesciene Egheen poente va_ rechte achter ghelaten . behoudelijc ene_ yghelijke_ sine_ goeden rechte en_ alsoe verre als ment van den vors_ hove cijslijc houdende es . En_ want wij scepen_ vors_ in alsusteneghe_ sake_ en~gheene sieghele ghebruken . En_ wij brieve . hier af te ghevene versocht sijn . soe versoeken wij voert en_ bidden met ernste Eersamen luden . Jannese van nederhem Henric van der monicke . Aerde matheeus wout_e van der eyke_ d_ ionghe scepen_ des hoefs va_ halen dat si al dat vors_ es ghelijker wijs dat voer ons ghesaet es voert op hen draghe_ wille_ en_ vesten met aen~hanghene haere zieghele En_ wij scepen_ va_ halen vors_ want dese scepen_ va_ zelke voers_ al dat hier vors_ es aen ons ghebrocht en_ in onser ieghenwordicheyt vertreckende ghetuycht hebben daer o_me haere beden gheonstich wesende en_ o_me die waerheyt hebben wij een met henr_ van eltre servaes ha_nemans Stasse barbiers onse mede~ghesellen in der vors_ scepenscap van halen onse scepen_ sieghele desen l_ren aen~ghehanghen . Jn den jare der gheborten ons heren dusent drie + hondert acht en_ tneghentich elve daghe in Septembri . . .