Corpus Van Reenen-Mulder (CRM14): Oorkonde P048p39901

Wij Johannes van nederhem en_ Stas barbiers Aert matheeus / Wout_ van der eyken der ionghe henric van eltre henric van der monicke en_ Servaes hannemans scepen_ te halen tughen en_ doen cond / allen luden die dese letteren solen sien en_ horen lesen / dat voer ons comen es Johan van der voecht van diest kinne_de en_ liende hoem wettelijc hebben vercocht wout_e wannemeker van diest een zille vijnlijx lants luttel min ofte meer gheleghen tzelke opte_ Couter daer die wech doer ghaet van zelke te honsym wert tusschen lant aelbrecht kiins op dee_ syde en_ lant henr_ van eltre op dander sijde van den vors_ wout_e wannemeker sine_ gheerve_ en_ naecomelinghe_ ewelijc en_ om_er peyslijc en_ vredelijc te besittene . En_ daer om_e soe es comen die vors_ Johan van der voecht en_ heeft dat vors_ lant op~ghedraghen in die hant ons Richters en_ vonneslijc vertiende met halme gheresigneert ten orb_e wout_ wannemekers vors_ Jn welken lande die vors_ wout_ waert gheerft en_ gheghoet met manesse ons richters vors_ en_ onser scepen_ vonnesse daer op ghegheve_ / daer voert toe ghesciede alle rechte en_ solempniteyt datter behoerlijc was toe te ghesciene Egheen poent va_ rechte achter~ghelaten behoudeleec eene_ yghelijke_ sine_ rechte en_ alsoe verre als dat vors_ goet van den vors_ hove va_ halen cijsleec ruerende es . Jn orcontscap deser litteren daer wij scepen_ vors_ onsen ghemeynen zieghel des vors_ hoefs hebben aen~ghehanghen jn den jaere der gheborten ons heren doen men screef dusent drie + hondert neghe_tich en_ neghen sesse daghe jn Julio - - -