Corpus Van Reenen-Mulder (CRM14): Oorkonde P051p35101

Wij kerstiaen van oesterhoven willem van oesterhoven gherart die vysschere kerstiaen daneels arnout jans henric joex en_ peter op ghene heyde scepenen van lu_pne van binnen doen Cont ende tughen dat vore ons en_ Robijnne van hoeelraken Richt_e mijns jonch_en van lu_pne lodowich vrancken bekinde ende gheloefde ane die woninghe diderics striders also alse gheleghen es te lu_pne beneve_ erve vrederics van herlaer op dene side en_ op dander side beneve_ erve wouters vorsters en_ ane ene zille beems die gheleghen es beneve_ erve willems van oesterhove_ op dene side en_ op dander beneve_ erve jan bloechs van westerhove_ en_ ane onder half bonre eerfs onder eusel en_ lant luttel mijn ocht meer dat gheleghe_ es beneve_ erve willems van oesterhove_ op dene side en_ op dander beneve_ erve diderics kinDere van oesterhove_ erflec achtien goede oude grote ene_ gulden hellinc altoes vore tvelve oude grote jaerlics te vergheldene des naestes maenDachs nae sinte remeys daghe ymm_meer ende euwellec lodowighe vrancken als een gichdragh_e ter porten behoef va_ herke_rode ocht den bringh_e des brijefs van Rechte te hebbene Ware och dat sake dat der voreghenoemder porte_ ocht bringh_e des brijefs va_ niet gnoech ghedaen en + worde va_ desen voreghenoemde_ achtien grote_ ten voreghenoe_de_ daghe soe mach der voreghenoe_der porte_ ghichdraghere ter porten behoef des anders daghes sine hant slaen also alst ghewoenlec es jn + die banc van lu_pne tote desen voreghenoe_de_ erve alse te hare_ wetteghe_ erve jn ghetucghenisse der waerheyt soe hebbe wij scepene_ voreghenoemt onsen ghemeynen zighel ghehanghen ane desen brijef . Ghegeven jnt jaer van ons heren gheboerten dusent dri + hondert ende en + en + vieftech jaer Drie daghe jn + de_ hoermaent