Corpus Van Reenen-Mulder (CRM14): Oorkonde P051p35901

Wi johan clocludere heinric kelberch johan va_ den bosghe kerstiaen van de_ bosghe kerstiaen va_ laren Matheeus huvenere ende johan der zaelmekere schepenen va_ lu_pne va_ buten / Doen cont ende tughen dat voer ons en_ vrancken d_ne richtere tsionch_en va_ lu_pne comen es jn sinen p_peren p_sone ende met voerdachteghe_ sinne godevaert va_ de_ corenhuyse va_ hasselt en_ heeft bekint en_ ghelijt dat hi heeft vercocht twe reale goet van goude ende swaer van ghewichte jaerlijcs te vergheldene des naestes manedaechs na sinte remeys dach ymmermeer ende ewelec joffrouwen berthen va_ loveric nonne te herkenrode di si becreghe_ heeft met enen wetteghe_ cope tieghe_ den voerghe_ godevaerde / Ende soe wannee dat dese voerghenoemde joffrouwe berthe va_ de_ levene tot der doet comen es soe solen joffrouwe Margryte va_ lyrode joffrouwe kathelina va_ lyrode ende joffrouwe odylia van loveric nonne_ te herkenrode dese voerghe_ twe reale heffen en_ deylen ghelijc hare levedaghe ende va_ der eenre op di andere te stervene en_ altoes ghelijc te deylene / Ende soe wa_nee dat di leste joffrouwe en es soe solen dese voerghe_ twe reale bliven te sofferane den ghemeinen covente va_ herkenrode / vore welke voerghe_ twe reale di voerghe_ godevaert heeft te onderpande ghesad deser voerghe_ joffrouwen berthen een buenre beemde gheleghe_ in di zeelbamde bi erve tshere_ van halbeke op di ene side / ende bi erve wouters hasen op di ander side / jn + de_ welken voerghe_ onderpande lodewich vrancke_ es ghegoet en_ gheerft te joffrouwe_ berthen behoef als een ghichdreghere na manisse des scouteyten ende vo_nisse der schepenen voerghe_ en_ daer toe + come_ met allen de_ rechte dat in deser sake_ sculdech es te ghesciene en_ gheen poent van rechte i_ deser sake_ achter ghelate_ noch verghete_ Met alsoe sulker voerwaerden waert dat sake dat deser voerghe_ joffrouwe_ berthen ochte bringh_e sbriefs va_ rechte niet gnoech ghedaen en woerde ten voerghe_ daghe soe mach die voerghe_ lodewich sijn hant slaen ter voerghe_ joffrouwe_ behoef ochtot bringhere sbriefs alsoe alst ghewoenlec es in di banc va_ lu_pne tote dese_ erve alse te hare_ wetteghe_ erve / Ende waert dat sake dat dese voerghe_ onderpant viele_ deser voerghenoemder joffrouwe_ berthe_ ochte eneghen va_ de_ ghene_ daer sijt toe gheordineert heeft vore dese voerghe_ twe reale / soe heeft dese voerghe_ joffrouwe berthe gheloeft crump en_ recht te gheldene ghelijc and_en reghenoten / Ende so wa dat dese voerghe_ joffrouwe berthe hare des weigherde ochte bringh_e sbriefs soe heeft dese voerghe_ joffrouwe berthe ghewilcoert overmids dese voerghe_ schepene_ dit voerghe_ goet verboert te sine / Ende des heeft dese voerghe_ joffrouwe ghewilcoert dese_ voerghe_ schepene_ ene_ brief besighelt met hare_ ghemeine_ sighele / Ende want wi schepene_ voerghe_ willen dat dese vorwarde vaste en_ ghestadech blive_ soe heb wi jn ghetughenisse der waerheit alle der dinghe_ di hier bove_ ghescreve_ sijn onsen ghemeinen sighel ane desen brief gheha_ghen ghegheve_ jnt jaer ons here_ doen men screef dusent dri + hondert neghene en_ vijftech des teendes daechs in den loemaent