Corpus Van Reenen-Mulder (CRM14): Oorkonde P051p36701

Allen den ghenen di desen brief solen sien ende hoeren lesen vrindelike gruete voerghesant Met kennisse der waerheit solen weten / Dat wi librecht van groelaren . reynere wouters . lambrecht mathys . heinric putman . heinric onder di eyke . kerstiaen coenraets . en_ heinric heinrics sone was peters van ghestele . schepenen va_ lu_mene van buten doen cont en_ tughen / Dat voer ons en_ arnoude va_ de_ venne richt_e te lu_mene ons heren h_en heinrics tsh_en va_ dyeste / comen es in sinen p_pere_ p_sone en_ Met sinen eyghene_ wille arnout va_ halechtren va_ scabroec / en_ heeft bekent en_ gheliet dat hi heeft vercocht twe guldene / enen ouden scilt goet va_ goude en_ swaer va_ ghewichte / ochte di werde daer af ghereke_t voer sestene groete / en_ enen gulden voer twelve groete / jaerlijcs te vergheldene jn sinte remeys daghe erflec en_ ewelec joffrouwe_ katherinen va_ bruestim nonne te herkenrode ochte brengher dis briefs va_ rechte tot der petancien behoef des goetshuys va_ herkenrode te hebbene / welke voerghe_ twe guldene dese voerghe_ joffrouwe becreghe_ heeft Met ene_ wetteghe_ coepe jeghe_ desen voerghe_ arnout tot der petancien behoef voerghe_ / en_ Met ghelde gheerts va_ den paenhuse ende alyden sijns wettechs wijfs wonende jn dis voerghe_ goetshuys goet te hasselt / voer di welke voerghe_ twe guldene / dese voerghe_ arnout heeft te onderpande ghesat deser voerghe_ joffrouwe_ tot der petancien behoef voerghe_ / den ertwech~bamt di houde_de es drie sillen luttel min och luttel Meer en_ es gheleghen aen den ertwech op di ene side / en_ bi erve willems va_ oesterhoven op di ander side / en_ bi erve heyliven kindere Moens op di derde side / en_ bi erve wouters eygrams op di vierde side / jn de_ welken voerghe_ onderpande / kerstiaen Minbier es ghegoet en_ gheerft als een Mo_boer en_ een ghichdraghere tot der petancien behoef voerghe_ / nae Maenisse des richters en_ vonnisse der schepenen voerghe_ / en_ Met allen den rechte / daer toe comen / dat jn deser saken sculdech es te gheschiene en_ gheen poent va_ rechte in deser saken achter~ghelaten noch vergheten / Met alsulker voerwaerden / waert dat sake dat deser voerghe_ joffrouwe_ ocht brengher dis briefs va_ rechte / tot der petancien behoef voerghe_ / niet gnoech ghedaen en woerde ten voerghe_ daghe van desen voerghe_ twe guldenen / soe Mach comen dese voerghe_ joffrouwe ocht brengher dis briefs va_ rechte Met den Momboer der petancien voerghe_ / en_ slaen haer hant alsoe alst ghewoenlec es jn di banc te lu_mene tote desen voerghe_ onderpa_de als tote deser voerghe_ petancien wetteghen erve / waert oech dat sake dat dese voerghe_ onderpant deser voerghe_ petancien bleve en_ viele voer desen voerghe_ ceys / soe heeft dese voerghe_ arnout ghewilcoert en_ gheloeft ov_mids richt_e en_ schepenen voerghe_ alle commer af te doene di aen desen voerghe_ onderpant staen Moechte / vte~ghenomen bede en_ drie penninghe h_en ceys / en_ oech dat willem van oesterhoven sinen wech daer over heeft te varene Met sijnre tydegher vrocht van de_ hoensbamde / voert Meer heeft dese voerghe_ joffrouwe en_ dese voerghe_ Momboer va_ der petancien weghen ghewilcoert en_ ? drie penninghe jaerlijcs te gheldene den here / en_ bede ghelijc anderen reenghenoeten va_ desen voerghe_ erve waert dat sake / dat dit voerghe_ erve / deser voerghe_ petancien bleve voer desen voerghe_ ceys / ende dese voerghe_ joffrouwe begherde te hebbene enen schepenen brief van ? voerghe_ voerwaerden / en_ dese voerghe_ arnout wilcoerdene overmids schepenen voerghe_ / Ende want wi schepenen voerghe_ ghenen ? syghel en hebben / en_ oech / dat wi willen / dat dese voerwaerden vaste en_ / ghestadech bliven / soe hebben wi schepenen voerghe_ ? . eersamen lieden den schepenen van lummene van binnen haren ghemeynen ? aen desen brief te hanghene / Ende omme beden ? deser eersamer liede deser voerghe_ schepenen / ende oech omme begheren ende wilcoren beyde der partyen voerghe_ / soe heb wi . willem van oesterhoven . kerstiaen daneels . vrederic cleminen . peter op ghene heyde . arnout pondernay . arnout witsheren . ende arnout goris schepenen van lummene van binnen onsen ghemeynen syghel aen ? brief ghehanghen / jn enen ghetughenisse der waerheit allen der voerwaerden di hier boven ghescreven sijn / Ghegheven jn den jare nae der gheboerden ons heren / doen Men screef dusent drie + hondert seven ende sestech des derteendes daechs jn di sporkille~maent