Corpus Van Reenen-Mulder (CRM14): Oorkonde P051p36901

Allen den ghenen di desen brief solen sien en_ horen lesen vrindelike gruete voerghesant Met kinnisse der waerheit solen weten / Dat wi johan clocludere . heinric kelberch . kerstiaen va_ den bosghe . kerstiaen va_ laren . Matheeus huvenere . willem op ghene heyde . en_ johan coex . schepenen van lu_mene va_ buten doen cont en_ tughen / dat voer ons en_ johan_e va_ laren richetere ons heren / h_en Everaerts van der Marken tsh_en va_ lum_ene comen es jn sinen properen p_sone en_ Met sinen eyghenen wille . arnout va_ de_ driesghe va_ hasselt ende heeft bekint en_ gheliet / dat hi heeft verwisselt twee reale / dat es te verstane / dertich groete / enen ouden scilt goet va_ goude en_ swaer van ghewichte ochte di werde daer af gherekent voer sestene groete / en_ ene_ gulden voer twelve groete / welke_ voerghe_ ceys dese voerghe_ arnout gheldende hadde jaerlijcs erflec en_ ewelec jn sinte stevens daghe aen een buenre bams dat houde_de es kathelina arnouts moeder haerzeels en_ es gheheiten der bamt va_ de_ gate en_ gheleghe_ in di zeel~bamde bi de_ groeten bamt va_ halbeke op di ene side / en_ bi erve arnouts haerzeels op di ander side / en_ op di derde side bi erve godevaerts slonx en_ heinrics der wedewen / en_ aen desen voerghe_ onderpant staen jaerlijcs te gheldene / vte~ghenomen desen voerghe_ ceys / de_ here va_ lu_mene vire penni_gghe te gront~ceyse / en_ joff_ berthen non_ te herkenrode twee reale di si daer ane oech becreghe_ heeft / welken voerghe_ ceys va_ arnouts weghen va_ de_ driesghe voerghe_ / joffrouwe lijsbet va_ papenbroec nonne te herke_rode becreghe_ heeft Met ene_ wetteghen wissele jeghe_ arnoude van de_ driesghe voerghe_ tot des goetshuys behoef va_ herke_rode tot robijns vigilien aen desen voerghe_ onderpant / Met consente en_ Met wille swarttenbroecs di Momboer es katherine_ haerseels en_ oech Met co_sente en_ Met wille arnouts haerzeels di erfman es va_ de_ voerghe_ onderpa_de na doet sijnre Moeder kathelinen / also dat si ghewilcoert hebben en_ gheloeft dese_ voerghe_ ceys jaerlijcs te gheldene jn sinte sthevens daghe erflec en_ ewelec deser voerghe_ joff_ lijsbetten ochte bringher dis briefs va_ rechte tot dis goetshuys behoef voergh_ te hebbene va_ desen voerghe_ onderpande / jn + den welken voerghe_ onderpa_de . kerstiaen Minbier es ghegoet en_ gheerft als een ghicht~dragher en_ een Momboer tot des goetshuys behoef va_ herke_rode voerghe_ / nae Manisse des richters en_ vonnisse der schepene_ voerghe_ en_ Met allen de_ rechte daer toe come_ / dat in deser saken sculdech es te gheschiene en_ gheen poent va_ rechte in deser saken achter~ghelaten noch vergheten Met alsulker voerwaerden / waert dat sake dat deser voergh_ joffrouwe_ lijsbetten ochte bringher dis briefs van rechte tot dis goetshuys behoefs voerghe_ niet gnoech ghedaen en woerde altoes ten voerghe_ daghe van desen voerghe_ ceyse / so mach comen dese voerghe_ joff_ ochte bringher dis briefs va_ rechte tot dis voerghe_ goetshuys behoef Met haren Momboer / en_ slaen haer hant alsoe alst ghewoenlec es jn di banc te lu_mene tote desen voerghe_ onderpande als tote dis voerghe_ goetshuys wetteghen erve / waert oech dat sake / dat dese voerghe_ onderpant / desen voerghe_ goetshuyse bleve voer desen voerghe_ ceys / soe heeft dese voerghe_ joff_ lijsbet / en_ oech kerstiaen Minbier Momboer en_ ghichtdragher dis voerghe_ goetshuys . ghewilcoert ende gheloeft daer af te gheldene bede en_ ceys ghelijc anderen reenghenoten / Ende va_ desen voerghe_ ceyse / en_ voerwaerden begherde dese voerghe_ joff_ lijsbet te hebbene ene_ brief en_ arnout va_ de_ driesghe / en_ oech di erfs liede consenteerden en_ wilcorden den brief / ende om_e begheren deser voerghe_ joff_ lijsbetten en_ wilcoren beyde der partyen voerghe_ / Ende oech dat wi schepenen voerghe_ willen dat alle dese voerghe_ voerwaerden vaste en_ ghestadech bliven / soe heb wi schepene_ voerghe_ / jn enen ghetughenisse en_ jn orkonde der waerheit alle der dinghen di hier boven ghescreven sijn onsen ghemeynen syghel aen desen brief ghehanghen / Ghegheven jn den jare nae der gheboerden ons heren doen Men screef dusent drie + hondert ende neghen + en + tsestech des vijfdes daechs van der Maent di gheheiten es hoermaent